"Ita iha situasaun ida ne'ebé ita bele dehan kontroladu teb-tebes. Liga ba artes marsiál, iha Manufahi ita bele dehan ne'e, kompara ho Munisípiu seluk Manufahi di'ak tebes, konfrontasaun laiha”, deklara Komandante PNTL Munisípiu Manufahi, Superintendente Polisia, Jony Viana das Regras, iha Administrasaun Munisipál Manufahi, kinta (29/07).

Tanba komandu PNTL Manufahi mós ho meiu aproximasaun ne'ebé iha, konsege halibur ona líder ho membru Grupu Arte Marsiál (GAM) haat hanesan, Perguruan Setia Hati Terate (PSHT), Ikatan Kera Sakti (IKS), Kmanek Haburas Unidade Nasional Timoroan (KORK), Kolimau-Dua-Ribu, nomós Arte Rituál hodi manifesta oinsá atubele kontribui ba estabilidade.

Iha mós kooperasaun ne'ebé di'ak mai husi fonte kredível lubuk ida ne'ebé hili hanesan Veteranu sira, Igreja, Juventude, NGO sira, nomós kamada sira seluk.

"Situasaun seguransa enjerál iha Munisípiu Manufahi, hahú husi fulan-janeiru to'o mai ohin loron, felizmente iha ambiente no ámbitu hakmatek”, dehan nia.

Maske nune'e, durante Serka Sanitária, kazu ne'ebé rejísta aas liu violénsia doméstika entre fen laen ne'ebé submete ona ba prosesu investigasaun, no tuir fali disputa rai, maibé konsege rezolve tuir dalan mediasaun husi Xefe Suku ho Aldeia nomós Ofisial Polísia Suku (OPS).

"Sorin seluk mak iha duni disputa rai, mais prontu ita iha OPS, tun ba halo kedas ninia atuasaun, liga ho na'i autoridade suku nomós aldeia para oinsá atu bele hamate problema sira ne'e", afirma nia.

Enkuantu rekursu iha komandu Munisípiu Manufahi rasik, oras ne'e iha membru efetivu hamutuk na'in-183 ne'ebé durante fó apoiu hela seguransa iha pontu tolu hanesan Leosatik, Daisua, no Fatuberliu ho fasilidade servisu ne'ebé sufisiente.

"Kontinua mantein hodi fó seguransa, vizilánsia e kontinua manifesta nafatin ba ita-nia sidadaun sira oinsá atubele nafatin demonstra ka manifesta uza máskara, mantein distansiamentu sosial e hatoman-an fase liman ho sabaun", hatete nia. (*)