"Ha'u atu konklui ida ne'e, fó agradese ba hothotu, e apresia ba hothotu liuhusi sertifikadu ne'e. Sertifikadu ida ne'e ami halo avaliasaun ho membru governu sira liuhusi konsellu ministru, dehan oinsá mak atu rekuñese parte hothotu. Entaun, ami dehan katak, ita fahe osan, sira sei han tiha osan, depois la husik hela buat ruma”, dehan Elizário durante diskuru ba Serimónia enseramentu sesta bázika iha salaun Administrasaun Munisípiu Manufahe, kinta (29/07).
Maibé, distribui sertifikadu ne’e maske surat tahan ida ne’ebé taka hela iha uma, aban-bainrua oan sira hare kontribuisaun inan aman nia rekuñesimentu.
Iha ne’e, agradese mós ba kompaña distributór sira ne'ebé asume risku hodi koopera ho governu hodi ajuda rekupera ekonómia povu iha situasaun Covid-19.
"Avaliasaun ba kompaña sira-nian, ne'e kabe ba governu ninia kompeténsia atu halo avaliasaun ba servisu sira ne'e di'ak ka lae. Maibe, parte SEKoop nian, sira ne'ebé simu sertifikadu ona, siknifika di'ak, partisipa iha kontribuisaun ida ne'ebé di'ak nian", afirma nia.
Aleinde ne'e, durante distribuisaun, hetan seguransa máximu husi Komandu PNTL Munisípiu Manufahe, husi eskuadra ba to'o membru Ofisial Polísia Suku (OPS) sira ne’ebé ho sakrifísiu tomak asegura ona estabilidade iha lokál distribuisaun ai-hán ba komunidade.
"Tanba ida ne'e mak sertifikadu ida ne'e, válidu husi estadu nian ne'ebé rekuñese partes hothotu nia partisipasaun iha distribuisaun sesta bázika ne'e", hatete nia.
Entrentantu Diretór Kompaña Shoot Rice Production, Americo Lopes haktuir, fofoun simu servisu husi governu liuhusi SEKoop, nu’udar nain ba kompaña, sente simu responsábilidade boot, tanba halo atendimentu ba komunidde kuaze rihun ba leten.
Maibé hafoin prosesu sira la’o, konsege finaliza buat hotu tuir meta governu nian hodi rekupera duni ekonómia família sira-nian iha baze.
"Foufoun ami simu servisu ida ne'e, sente hanesan buat ida todan. Mais depois de prosesu sira ne'e la'o, ikus mai buat hotu la'o ho di'ak. Tanba ne'e atu dehan katak, iha ha'u-nia parte ne'ebé ami fahe ba, laiha problema ruma mak mosu", afirma nia.
Tuir dadus, totál benefisiáriu iha Munisípiu Manufahe ne'ebé benefísia ona ai-hán sesta bázika husi SEKoop nia responsável, hamutuk 70.239, feto hamutuk 34.900 no mane 35.339. Enkuantu, Munisípiu Manufahe iha Postu Administrativu Turiskai, Fatuberliu, Alas ho Same, iha totál Suku hamutuk 29, aldeia 137, ho nia área luan hamutuk 1643,76 kilometru kuadradu. (*)
