Print this page

Kooperativa TOKA-BM Hahú Akomoda US$1,755

Prezidente Kooperativa TOKA-BM, Martinha Santa Antunes ko'alia hela ho jornalista sira iha  Manufahi. Kinta (29/07). Prezidente Kooperativa TOKA-BM, Martinha Santa Antunes ko'alia hela ho jornalista sira iha Manufahi. Kinta (29/07). Foto Tempo Timor

Tempotimor (Dili)-Kooperativa Multiseitoral Todan Kaman, Bin Maun (TOKA-BM) durante ne’e hahú akomoda osan ho montante hamutuk US$1,755 iha kofre. Maske ne’e foin hari’i iha loron 27 fulan-Juñu tinan 2021, foin kompleta fulan ida ho membru hamutuk na’in 53, maibé membru sira akomoda ona kapitál finanseira.

Prezidente Kooperativa TOKA-BM, Martinha Santa Antunes informa, kooperativa ne'e sai nu'udár kooperativa ida ho karáter multiseitorial, tanba hala'o atividadé agrikultura, fó kréditu inklui produz mina nu’u ne'ebé transforma fali ba ai-moruk.

"Kooperativa ida ne'e ho nia atividade halai ba seitór agrikultura nomós oinsá mak husi ai-hán lokál, halo prosesamentu ba ai-hán komérsial”, hatete nia, iha Aldeia Seharema, Suku Babulu, Postu Administrativu Same, Munisípiu Manufahi, kinta (29/07).

Iha kooperativa kréditu nian, membru sira fasilita kréditu ba malu to'o fulan foin bele fó empresta ho pursentu jurus ne'ebé mínimu ba pursentu 3 (3%).

"Iha ne'e, feto maluk sira iha kreatividade produz produtu lokál. Ida mak nia produz mina nomós iha ai-moruk tradisioanl, katak inan-feton sira ne'ebé hahoris oan feto, bele uza mina ne'e atu nune'e oan sira nia fuuk bele mahar ou mós ba sira fuuk monu, ita bele uza mina ne'e hanesan mós ai-moruk tradisionál atu nune'e bele fó moris filafali fuuk oan”, dehan nia.

Produtu mina hirak ne'e, barak liu membru sira halibur husi material lokál ka produtu sira natureza nian iha ida-idak nia toos laran hodi transforma fali ba ai-moruk.

Ai-moruk hirak ne'e, iha balu lori ona ba fa’an iha Dili, no balu fa’an de'it ba komunidade sira iha Munisípiu Manufahi, maibé sira seidauk bele asesa ba merkadu públiku, ho razaun sira labele hetan dalan oinsá atu asesu ba merkaduria.

"Iha ne'e ita bele dehan, karik ai-moruk ne'e mak ita buka antes tiha mai semana ida, nia habai tiha durante semana ida to'o maran ona, entaun iha loron ida nia bele produz mina ba to'o litru 10", dehan nia.

Ba osan ne'ebé hetan, kada fulan membru ida-idak tenke hatama osan obrigatóriu ba kofre kooperativa nian. Tanba kritéria atu sai membru permanente ba kooperativa multiseitorial TOKA-BM, kada ema tenke kontribui valór osan hamutuk US$35.

“Siknifika katak, simpanan pokok iha US$20, simpanan wajib iha US$5, osan administrasaun iha US$10. Ho nune'e kada ema ida mak atu sai membru, nia tenke rai osan hamutukUS$.35", esplika nia. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items