"Iha suku Manlala problema primeiru ne'ebé komunidade hasoru mak bee-moos, tanba maioria ne'e komunidade sira hela liu iha bee ulun entaun  bee la sa'e, nune'e iha tempu bailoro susar los atu hetan bee mós”, dehan Xefe Suku Manlala, João Batista Alves, kinta(16/09)

Dadaun ne'e Programa Nasionál Dezenvolvimentu Suku (PNDS) tama ona iha suku Manlala, maibé seidauk realiza no finaliza tanba ho razaun mákina bomba bee laiha.

"Programa PNDS tama ona maibé seidauk realiza no finaliza tanba sei buka hela mákina bomba bee, tanba ida ne'e ami sei hasoru nafatin problema kona-ba bee-moos ne'e", dehan nia.

Nune'e husu ba parte relevante sira atu tau matan lalais ba asuntu refere, tanba postu Polísia Naionál Timor-Leste (PNTL) no postu saúde inklui eskola mós iha hotu bee ulun, difikulta tebes ba komunidade nia saúde.

Suku Manlala iha mós problema hanesan estrada liga husi postu ba suku, ne'e maioria la di'ak no iha tempu udan ema viajen la bele tanba rai dodok no namdoras, maibé komunidade maioria asesu hotu ona liña eletrisidade no hela uma-kain lima mak seidauk. (*)