Apoiu ne'e liuhusi ekipa Halibur Laklo Anan ne'ebé estabelese Postu umanitária área Taibessi, Aldeia Haslaran, Suku Bemori, Postu Administrativu Na'in Feto, Munisípiu Dili.
Reprezentante Assosiasaun Emprezáriu Joventude Xineza ihaTimor-Leste, Rudi Kwan hatete, sira ajuda bebeik ona vítima sira, no bá Manatutu sira koordena hela, maibé tanba serka sanitária ne’ebé difikulta sira seidauk bele fó apoiu.
"Depois foin dadauk ami hetan pedidu husi Postu halibur Laklo Anan. Ohin, ami lori mai hanesan fós 100, inklui roupa 2000 , sapatu 300, xinelus 200 ho sasán nesesidade seluk", dehan Rudie iha Taibessi, domingu (25/04).
Entretantu, nia mós agradese bá ekipa, tanba liuhusi sira, asosiasaun Xineza bele fó apoiu direta bá vitima dezastre naturál sira iha Laklo.
Iha fatin hanesan, Koordenadór ekipa Halibur Laklo Anan, António Carceres de Carvalho, agradese ba asosiasaun Xineza nia apoiu no sei lori to’o vítima sira iha Postu Laklo.
"Ami mós sei aprezenta fali relatóriu final bá maluk sira, bainhira distribuisaun remata, nune'e bele iha nafatin klnfiansa husi parseiru sira iha futuru", agradese nia.
Tuir dadus, totál populasaun iha Postu administrativu Laklo ne'ebé afetadu husi dezastre naturál hamutuk 270 pesoál mak sai vítima, balu lakon sasán, inklui na'in-lima mak lakon vida.(*)
