Print this page

Problema Bee iha Eskola, Obriga Estudante Kay Rala no ESTV Mauhuno Lalin Bee Mota

By February 22, 2021 2874
Estudante sira husi Eskola Sekundária Kaya Rala Manatutu kuru hela bee iha mota Kay Rala, lalin ba eskola hodi uza iha hariis fatin, inklui atividade prátika Estudante sira husi Eskola Sekundária Kaya Rala Manatutu kuru hela bee iha mota Kay Rala, lalin ba eskola hodi uza iha hariis fatin, inklui atividade prátika Foto Tempo Timor

Tempotimor (Manatutu)- Infrenta problema kona-ba laiha bee-mos iha eskola, nune'e obriga estudante sira iha Eskola Sekundária Públika Kay Rala ho Eskola Tékniku Vokasional (STV) Mauhuno Bucar munisípiu Manatutu, konsekuensia tenke ba kuru bee husi mota.

Diretór Eskola Sekundária Públika Kay Rala, Nelson Rodriguês Pereira informa, difikuldade boot ne'ebé sira hasoru loro-loron iha eskola maka bee-mos laiha, tanba ho númeru estudante neebé barak, nune'e obriga estudante sira tenke lori husi mota ka uma hodi uza fali ba nesesidade eskola nian.

"Devezenkuandu ami haruka estudante sira kada ema ida mai lori ho bee Aqua $.0.50 nian ida husi uma, hodi atende ba neseidade sira nian iha eskola hanesan soe foer ho seluk tan", dehan diretór eskola Kaya Rala, iha nia kna'ar-fatin ba www.tempotimor.com iha Aldeia Karlilu, Suku Aiteas, Postu administrativu Manatutu Villa, munisípiu Manatutu, sábadu, (20/02).

Nia hatutan, ho problema ne'ebé sira hasoru, parte tékniku kanalizasaun bee husi Servisu Água no Saneamentu (SAS) Manatutu nian rasik mós laiha liu atendimentu ba sira nia problema bee-mos iha eskola Kay Rala.

Husi sorin seluk, Diretór Eskola Sekundária Tékniku Vokasional (ESTV) Mauhuno Bucar, Francisco Pires hatutan, durante tinan barak nia laran bainhira governu halo instalasaun ba eskola ESTV Mauhuno Bucar iha 2013 to'o ohin loron, bee-mos ba sira laiha.

Nia dehan, ho problema bee neebé laiha, obriga professór ho estudante sira hulan masa Jirgen litru 5 ba kuru bee-merak husi mota lori ba enxe iha haris-fatin eskola nian.

"Entaun, difikuldade ne'ebé ami hasoru iha ne'e kada tinan no kada loron maka ami professór ho alunu sira tenke lalin bee ho kolometru 2 to'o 3 hodi mai iha eskola para atu bele prienxe lori responde ba ami nia nesesidade bázika ne'ebé ami infrenta iha eskola", nia preukupa.

Tuir nia, problema bee-mos ne'ebé laiha, difikulta tebes sira iha prosesu aprendijazen no susar liu tan mós ho situasaun Covid-19, ne'ebé regra balu haktuir husi Ministériu Saúde (MS) ho Organizasaun Mundial Saúde (OMS) katak tenke fase liman bebeik, maibé susar atu hetan bee iha eskola.

Reprezentante estudante husi ESTV Mauhuno Bucar, iha departamentu Produsaun Agrária, Alzira Maria do Rego haklaken, iha sira nia prátika ba matéria Ortikultura, presíja duni bee hodi uza ba rega modo, maibé realidade ne'ebé difísil ba mak laiha bee.

"Ami nia bee, husi ne'e ba kuru ho distansia dook oitoan, ne'ebé ami presíja husu ajuda ba relevantes atu bele tau matan netik ba ami nia eskola ida ne'e liuhusi kanaliza bee mai iha ne'e, nune'e ami bele hala'o atividade prátika sira ho di'ak no susesu", dehan nia.

Entretantu, total estudante iha Eskola Tékniku Vokasional (ESTV) Mauhuno Bucar hamutuk 154, no professor sira hamutuk na'in-15.

Iha eskola Sekundária Públika Kay Rala iha totál estudante hamutuk 276, ne'ebé mestri sira hafahe ba turnu-tolu, sira klasse 3 tama eskola iha dader tuku 08:00 sai tuku 12:00, klasse 2, tama fali iha tuku 12:15 sai iha tuku 14:30, no sira klasse 1 tama iha tuku 14:30, sai fali iha 17:00 oras loro-kraik.(*)

Rate this item
(0 votes)
Last modified on Monday, 22 February 2021 11:05
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items