KUL Festeza Aniversáriu Konsulta Populár Ho Semináriu, Reflete Hikas Sofrimentu Povu TL Iha Rezisténsia

Estudante Klibur Universitáriu Laclo (KUL) hasai foto hamutuk ho oradór sira iha salaun Parókia Igreja São Vicente Ferrer Laclo, Sábadu (29/08) Estudante Klibur Universitáriu Laclo (KUL) hasai foto hamutuk ho oradór sira iha salaun Parókia Igreja São Vicente Ferrer Laclo, Sábadu (29/08) Foto Tempo Timor

Tempotimor (Manatuto)- Organizasaun estudante husi Klíbur Universitáriu Lacló (KUL), festeza loron independénsia nasionál Konsulta Populár ba dala-XXI (30 Agostu 1999 to'o 30 Agostu 2020), ho atividade semináriu, hodi reflete hikas sofrimentu povu Timor-Leste (TL) ne'ebé uluk sakrifika-aan iha luta libertasaun pátria.

Prezidente komisaun organizadóra Yohanes Cárceres esplika, objetivu husi semináriu ne'e, atu hanoin hikas povu TL nia sofrimentu, iha luta pasadu, hodi fó valorizasaun ba sira nia luta durante ne'e, to'o hetan independénsia totál.

“Semináriu ida ne'e ami hala'o ho objetivu atu ami bele halo reflesaun ba ami ida-idak nian-aan, oinsá bele hatene kona-bá sakrifísiu luta ne'ebé ita nia eroi sira inspira hela mai ita, tanba liuhosi sira mak ohin loron ita hotu goza independénsia ida nee”, hatete prezidente komisaun organizadora, Yohanes Cárceres ba www.tempotimor.com hafoin semináriu, iha Salaun Parokiál, Igreja São Vicente Ferrer, iha Postu-Administrativu Lacló, Munisípiu Manatuto, sabádu (29/08).

Nia argumenta, loron konsulta populár sai hanesan pontu ida ne'ebé aas liu, ba povu TL tomak hodi define sira nia pozisaun, sai nasaun ida ne'ebé independente no soberanu, nune'e nia husu ba sidadaun tomak, atu halo reflesaun ba ida-idak nia-aan, hodi haree ba dezenvolvimentu.

Nia afírma, atividade ida ne'e mós la ses husi estudante universitáriu sira nia papél, hanesan edukasaun, peskiza no dedikasaun komunitáriu, tanba ne'e universitáriu iha pilár importante, atu hatene klean istória hirak ne'ebé akontese iha pasadu, liu-liu ligadu ho luta, iha tempu rezisténsia.

Nia dehan, komemorasaun ba tinan ida ne'e, la'ós deit ho atividade semináriu, maibé hala'o mós atividade sosializasaun informasaun, kona-bá moras prevensaun tuberkoloze, ba estudantes eskola sekundária katólika, São João Paulo II no EBC 05 de Maiu Lacló.

“Iha dia 29 Agostu kalan, ami halo reflesaun liuhosi loke filmajen, no iha loron 30 Agostu, ami konjunta ho autoridades lokais ho atividade husu misa, hodi fó agradesimentu ba martir sira nia luta libertasaun nasionál”, dehan nia.

Iha fatin hanesan, Dosente Siénsia Sosiál no Polítika husi UNTL, Aniceto Guru Berteni Neves hatete, iha era Ukun-aan universitáriu hola papél ida importante, liuhosi estuda maka'as, hodi kontribui ba dezenvolvimentu TL, tanba juventude pasadu luta ona, hodi liberta pátria.

"Estudante sira tenke estuda maka'as, buka aprende nafatin ita-nia istória luta iha pasadu, tanba bainhira imi reflete didiak aan, ida nee bele guia imi atu bele hakonu imi nia espirítu, hodi haree ba oin", dehan Dosente UNTL, Aniceto Guru Berteni Neves, bainhira sai oradór daruak, ho tema espesífiku "Perspetiva Akadémika iha Luta ba Ukun-aan, no Luta ba Dezenvolvimentu".

Entretantu, atividade ne'e rasik organiza husi estudante Klíbur Universitáriu Lacló (KUL), grupu Juventude Agrikultura Lacló (JALA), Luzerna Kuri-Neo no hetan partsipasaun másimu, husi autoridade lokál inklui juventude Lacló oan tomak, ne'ebé kompostu husi suku lima, hanesan Uma-naruk, Lakumesak, Hohorai, Uma-kaduak no Laikore.

Rate this item
(0 votes)
Last modified on Monday, 31 August 2020 21:12
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Right256

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« April 2021 »
Mon Tue Wed Thu Fri Sat Sun
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30    

Tempo Timor Networks

Online Counter