Na'in 2 iha Manatuto Hatudu Hikas Sintomas, SIJK Prolonga Periodu Kuarentena

dr. Sergio Lobo portavoz Sentru Integradu Jestaun de Krize kona ba Covid 19 ko'alai ba jornalista iha sala Situasaun CCD (21/4) dr. Sergio Lobo portavoz Sentru Integradu Jestaun de Krize kona ba Covid 19 ko'alai ba jornalista iha sala Situasaun CCD (21/4) Foto Januario Varela

Tempotimor (Dili)-Timor-oan na'in rua husi na'in lima ne'ebé halo ona teste no hatudu rezultadu negativu dezenvolve sintomas Covid-19, ho nune'e, Sentru Integradu Jestaun Krize (SIJK) deside hodi la husik sira fila ba uma maske sira kompleta ona periodu inkubasaun loron 14.

Tuir informasaun husi Portavoz SIJK, Sergio Lobo, suspeitu na'in 5 ne'ebé durante ne'e hela iha kuarentena obrigatoriu iha Hotel Suprise, Munisipiu Manatuto, hamutuk ho ema na'in 36 seluk halo ona teste no rezultadu hatudu negativu.

Maibé, nia hatutan, bainhira sira-nia loron kuarentena remata, suspeitu na'in rua husi na'in lima refere hatudu hikas sintomas Covid-19, nune'e tenke halo fali teste.

"Husi Manatutu loloos ohin sai na'in 5, tanba sira iha horibainrua teste na'in 5 negativu hotu, entaun horseik atu hasai, maibé ida hetan fali sintomas i ohin mós ida hetan tan fali sintomas i sira na'in 5 ne'e kontinua fali kuarentena hodi halo teste foun, karik rezultadu sai negativu foin sira bele sai," dehan Sergio iha Sentru Konvensaun Dili, Tersa (21/04).

Molok ne'e, Diretór Serbisu Saúde Munisipiu Manatuto Mateus Vicente Correia informa, Timor-oan na'in 41 mak tama iha kuarentena obrigatoriu iha munisipiu Manatuto.

Ema hirak ne'e, nia hatete, fila husi Indonezia iha 5 Abril 2020 no ekipa SIJK simu sira no lori kedas ba Manatutu hodi tama iha kuarentena iha Hotel Suprise.

"Atu hato'o de'it katak, total pasajeirus ne'ebé mak ami simu iha munisipiu Manatuto hamutuk 41, kompostu husi mane na'in 11 no feto na'in 30, ami simu sira iha dia 5 Abril tuku 7 kalan no lori kedas sira ba hotel Suprise atu kumpre 14 dias kuarentina," dehan nia.

Husi na'in 41 ne'e, Mateus hatete, ema na'in 3 mak hamosu sintomas Covid-19 no parte mediku sira hasai amostra hodi halo teste.

"Primeira faze hasai na'in 3 nia sample hodi teste no rezultadu hatudu negativu, foin dadauk Kuarta (14/04) ami deteta tan sira na'in 5 hatudu sintomas, entaun ami konvida fila-fali ekipa nasional mai hasai sira-nia sample hodi ba teste," dehan nia.

 

Rate this item
(0 votes)
Last modified on Wednesday, 22 April 2020 06:17
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com