Tempotimor (Dili)-Prezidente Eletrisidade Timor-Leste (EDTL), Paulo da Silva hatete, projetu eletrifikasaun komunitária no programa eletrifikasaun nasionál nivel suku atinje ona pursentu 91.

"Informa ba Primeiru Minístru dadaun ita atinje ona a nível suku konklui pursentu 91 no restu ita halo konstrusaun la'o namanas hela", nia informa hafoin halo audiensia ho Primeiru Minístru, Taur Matan Ruak iha palásiu governu, tersa (28/02).

Suku sira ne'ebé to'o oras ne'e seidauk asesu, tuir prezidente nia espetativa katak, fulan haat ka lima mai sei finaliza.

"Ita nia espetativa fulan haat (4) ka liman (5) mai oin ita bele kompleta maior parte para kobre a nível suku", nia afirma.

Nune'e ba suku sira ne'ebé la konsege finaliza sei koloka projetu komunitáriu atu populasaun sira asesu eletrisidade iha tempu tuir mai.

Alende ne’e, governu mós hahú lansa ona tenderizasaun nasionál ba instalasaun solár panel iha Postu Administrativu Laleia, Munisípiu Manatutu.

"Hahú ohin ita lansa ona tenderizasaun nasionál ba solár panel (tenaga surya) 72-85 MG iha Laleia Manatutu, entaun ohin ita lansa ona ba públiku", nia informa.

Husu ba setór privadu sira hatama sira-nia proposta depois atu halo avaliasaun, tuir EDTL nia espetativa iha fulan-agostu nia laran bele hetan ona manán na'in ba tenderizasaun refere.

"Selebra kontratu hodi halo investimentu ba solár panel ne'e", hatutan nia.

Orsamentu ne'ebé EDTL prepara ba lansamentu solár panel hamutuk miliaun US$120 inklui plantasaun no seluk tan.

"Kustu investimentu kapitál ne'e miliaun US$120, ne'e kustu estimativu mais depende ba kompaña ne'ebé manán mai ho sira-nia estimativa balun bele miliaun US$90 balun bele miliaun US$100, maibé ida US$120 ne'e inklui plantasaun no mós prestasaun no value stories energy sistema ne'e rasik, ida ne'e mak purvolta US$120", nia hateten. (*)

Tempotimor (Dili) - Prezidente Eletrisidade Timor-Leste (EDTL), Paulo da Silva hatete, governu prevé orsamentu hamutuk millaun US$ 8 atu hari’i tore Eletrisidade iha Timor-Leste.