"Iha munisípiu Likisá liliu bee-moos, tanba durante fulan ida resin ona, ami sosa de’it bee, ne'e oinsá?, komunidade sira ne'ebé mak kbi’it la’ek tebes, la bele sosa bee ne'e oinsá", dehan Reprezentante Asosiasaun Feto Munisípiu Likisá, Graciana da Silva, iha diálogu ho Lú Olo iha Salaun Tokodede, sesta 17/12).
Iha Likisá komunidade sira kada loron tenke sosa bee-moos atu uza ba nesesidade loroloron tanba kanalizasaun bee-moos la funsiona.
Nune'e, Xefe Aldea Faustino Xavier informa, Komunidade aldeia Kamalehou, Suku Lauhata enfrenta problema bee-moos, tanba perfurasaun ne’ebé antes ne’e iha avaria, kauza husi dezastre naturál.
“Ami husu, se bele fura fali bee-moos ba ami-nia komunidade, atu ami bele asesu ba bee-moos ho dignu", hatete nia.
Enkuantu komunidade, Fernando Santos Amaral relata, situasaun bee-moos sai problema ba komunidade sira iha suku Ulmera, Aldeia Turlala, nune'e komunidade sira tenke husik sira-nia hela fatin ho distánsia kilometru 2 hodi bele asesu ba bee-moos.
“Ukun-an tinan 19 ona, maibé bee-moos ba ami de'it laiha, situasaun ne’e halo ami sente vulnerável tebes", dehan nia.
Hatan ba prekupasaun ne'e, Vise Ministru Administrasaun Estatal, Lino de Jesus Torezão, rekoñese, bee-moos nu'udar nesesidade báziku ba komunidade sira, tanba ne’e Governu liuhusi Ministériu Administrasaun Estatal (MAE) ho Programa Dezenvolvinentu Nasional Suku (PNDS) tau mós prioridade ba bee-moos.
"Iha programa PNDS ita tau osan serka 35 to'o 50 mill ba kada suku atu iha jestaun rasik hodi dada bee-moos ba komunidade", esplika nia.
Iha PNDS mós tau prioridade ba bee-moos tanba ne’e, hein katak sei rezolve komunidade nia preokupasaun sira ne’e.
"Iha tinan 2022 MAE liuhusi programa PNDS aloka orsamentu hamutuk 6 millaun, atu rezolve komunidade sira-nia preokupasaun liga ho bee-moos", informa nia.
Entretantu, Vise Ministru Obras Publika (MOP), Nicolau Lino Freitas hatete, kona-ba bee no saneamentu iha munisípiu Likisá oras ne’e MOP halo hela programa reabilitasaun bee-moos ba aldeia Pandemu no Maulau, suku Vavikinia, Postu Maubara ho kustu orsamentu rihun US$359, no reabilitasaun tanki reservatóriu iha suku Dato, Postu administrativu Likisá Villa ho luan 4000 m² no totál orsamentu hamutuk rihun US$200.
“Husu komunidade sira pasiénsia hodi hein atubele asesu ba bee-moos tuir programa Governu nian", dehan nia. (*)
