"Husi dadus ne'ebé iha totál komunidade pursentu 87 mak asesu ona, hela de'it pursentu 13 ne'e mak ohin pergunta sira ne'ebé ita-boot sira husu, ha'u hanoin katak, iha suku hamutuk 3 mak seidauk asesu ba eletrisidade, ho nune'e 2022 ita aloka ona osan ho montante US$1.4 milhões atu finaliza suku ne'ebé seidauk kompleta", deklara Nicolao ba komunidade Likisá iha Salaun Tokodede, sesta (17/12).
Espera katak tinan 2022 to'o 2023, sei finaliza obra eletrisidade iha munisípiu Likisá ne'ebé kompostu husi suku 3 seidauk kobre.
"Liliu suku ne'ebé mak ita-boot sira husu, mak suku Fahilebo ba Lebuloa, Laklo Lema ba Hatukesi, Asumanu no Kutlau ba Baura, Dukumera ida ne'e mak seidauk, no sei tau orsamentu ne'ebé planu sei finaliza iha tinan oin", dehan nia.
Koordenadór Rede Sosiedade Sivíl Munisípiu Likisá, Paulino Francisco hatete, iha suku Fahilebo, Munisípiu Likisá to'o oras ne'e seidauk asesu ba eletrisidade tanba veteranu sira hadau malu ba projetu refere.
"Iha parte Railaku ahi lakan, iha Bazartete ahi lakan, Ulmera ahi lakan, maibé suku Fahilebo na’i veteranu sira sei hadau malu hela ho projetu ida ne'e, oinsá eselensia Prezidente ninia haree hanoin ba ida ne'e", dehan nia.
Tanba eletrisidade iha munisípiu Likisá, suku Fahilebo sai problema boot to'o ohin loron seidauk bele rezolve.
Reprezentante Asosiasaun Feto iha Munisípiu Likisá, Graçiana da Silva hatutan, iha munisípiu Likisá, postu saúde iha suku balun to'o oras ne'e seidauk asesu ba eletrisidade.
"Iha postu saúde suku Asumanu laiha eletrisidade, postu saúde Hatukesi laiha eletrisidade nomós iha postu saúde Fahilebo rasik to'o agora la asesu ba eletrisidade inklui suku Leotela", dehan nia.
Nune'e veterana, Madalena Bidau Soares 'Kasian' haktuir, eletrisidade temi mak temi, dada hanesan buraxa to'o agora povu halerik eletrisidade la tama.
"Eletrisidade balun impede iha ami feto halo, maibé to'o ikus ami loke liman ba ema halo eletrisidade ba populasaun, maibé orsamentu ba ne'ebé, orsamentu ba foho rai nia kuak", katak nia.
Maibé nu'udar veterana la reklama osan, loke liman para halo ba, osan Governu la fó ba sira mós, la problema, importante povu uza eletrisidade hodi sente naroman. (*)
