"Benvindu no kongratula ba Prezidemte Repúblika Demokrátika Timor-Leste ho komutiva ne'ebé iha disponibilidade hodi mai vizita no halibur hamutuk ho ami iha Likisá, ami sente orgullu tebes no ksolok tebes ho ita-boot nia vizita ida ne'ebé, ho objetivu fundamentual atu haree no rona direta povu Likisá nia lian", dehan nia iha Salaun Tokodede, sesta (17/12).
Prezidente Repúblika (PR), Francisco Guterres 'Lú Olo' hatutan, ho haksolok boot tebes ohin bele mai hamutuk ho komunidade Likisá sira atu dada lia oituan.
"Prezidente nia mandatu besik remata ona, maibé seidauk remata, tanba ne'e ha'u filafali mai hamutuk ho imi povu ida Likisá, liuhusi reprezenta sira ne'ebé hola fatin hamutuk ho ha'u iha ne'e, atubele dada lia filafali", dehan Xefe Estadu.
Prezidente sei kasu lia iha Munisípiu Likisá liuhusi diálogu, tanba husi diálogu mak bele hetan solusaun ba problema saida de'it, tanba laiha diálogu sei la hetan solusaun ba problema saida de'it.
"Diálogu siknifika ita espresa sai, ko'alia sai, saida mak ita hanoin, saida mak ita sente, atu ida seluk bele rona, nia bele konkorda, nia bele la konkorda ho saida mak ita hanoin, saida mak ita hakarak, iha dalan ida ne'e mak ita bele buka solusaun, solusaun saida mak ita bele hetan", hatete nia.
Diálogu la’ós ukun-an mak foin aprende, maibé diálogu hori nanis kedak bei-ala sira wainhira lia naksala ba malu, sira sempre tur hamutuk atu ko'alia ba malu, hodi hetan solusaun ba problema. (*)
