Xefe Suku Guiso, Liberato Araujo Nunes deklara, problema ne'e akontese, husi Mota Loes, no mota sira iha foho, sobu komunidade nia uma no iha tinan hira liu bá, harahun ona uma-komunidade hamutuk 80-resin.

"Mota Loes, sobu komunidade nia uma, 80-resin ne'e husi Suku Guiso nian de'it, ho sira-nia rai to'o uma ba hotu, iha mota laran", dehan nia hafoin hasoru malu ho Komisaun E ne'ebé trata asuntu infraestrutura iha Parlamentu Nasionál, kinta (16/09).

Tanba ne'e, autoridade husi suku Guiso ho Lisadila deside marka audénsia ho Prezidente Komisaun E, tanba suku rua, suku Guiso no suku Lisadila, sempre hetan inundasaun, no problema ne'e autoridade levanta dala-barak ona.

"Sorti liuhusi ami-nia mata dalan mak NGO, NDI, hatudu dalan, ohin ami bele mai hasoru malu ho prezidente Komisaun E", afirma nia.

Iha tinan 2015, Primeiru Ministru, Taur Matan Ruak, kuandu sei Prezidente Repúblika, nia ba vizita to'o iha ne'ebá hodi haree no hato'o mós suku rua ne'e nia preokupasun maibé, to'o agora laiha rezultadu.

"Ho ida ne'e mak, liuhusi ami-nia matan dalan, NDI, ohin hatudu dalan mai ami, hasoru malu ho Prezidente Komisaun E, ko’alia kona-ba problema hirak ne'ebe mak akontese tina-tinan iha ami-nia área”, dehan nia.

Reforsa ba kestaun ne'e, Xefe suku Lisadila, Fernando Lobo hatete, Kona-bá dezastre natural ka inundasaun ne'ebé suku Lisadila enfrenta, iha 2017, konsege sobu komunidade nia uma hamutuk 79.

"Iha 2017, hetan estragus, uma kain 79, inklui igreja nomos ema nia kios, kintal, animal, e ne'e iha 2017,"dehan nia.

Aleinde, iha tinan 2018 to'o 2019 mós hanesan, sobu nafatin komunidade nia hela fatin, no komunidade nia to'os.

Maske momentu ne'eba halo ona pedidu, ba Obras Públika, Komisaun E Parlamentu Naisonál, no Primeiru Ministru, Taur Matan Ruak liuhusi audénsia ho asesór Primeiru Ministru, iha Palásiu Governu.

"Ida ne'e mak, horisehik sira telefone ami, ohin ami mai hasoru malu iha ne'e, tanba ne'e mak ami-nia problema ami hato'o para ba oin bele tau netik kestaun ida, bele tau netik hanoin ida ba suku rua ninia problema”, dehan nia.

Prezidente Komisaun E, Abel Pires promete, sei marka tempu ida ba haree iha fatin ida ne'e.

"Ohin sua exelensia Prezidente komisaun E, marka loron, mais data seidauk determina, maibé sei ba haree iha fatin, pois mak sei ko’alia ba oin ne'e halo nusa", dehan nia.

Iha tempu Portugéz, mota-loes ne'e nia luan, 900-resin, maibé tanba ho situasaun udan ne'ebe monu rai kada tinan to'o ohin loron nia luan hahú aumenta ba kilometru rua-resin, ne'ebé fó ameasa no estraga hotu área produtividade iha suku rua refere. (*)