Prezidente KAN, Matinho dos Santos, hateten osan ne'ebé hetan, membru sira tau hamutuk iha sira nia kréditu hodi fó fali ba membru sira empresta hodi hadi'a ida-idak nia moris.

"Ami kada tinan prodús toneladas 20 ba leten, mais agora ne'e iha toneladas 12 mak sei iha, ne'ebé kompañia atu sosa", Martinho dos Santos hateten iha suku Fahilebu, Sábadu (12/12). Entretantu, daudaun ne'e KAN, iha membru hamutuk ema na'in 115, ho kapitál hamutuk rihun $45 liu.

"Sé membru mak empresta, ami fó 3%. Maibé la fó ba liur, fó ba membru iha suku laran de'it. Sira bele foti rihun $2, ou $2500 atu selu oan sira nia eskola, halo negósiu ho seluk tan", nia esplika.

Nia hateten, durante ne'e sira seidauk hetan apoiu kapasitasaun ruma husi governu ba iha membru sira, maibé sira iha ona planu sei halo pedidu ba SEKoop atu fó apoiu formasaun ba sira hodi hasa'e kapasidade.

"Durante ne'e ami komunidade lubuk ida ne'e moris di'ak ne'e hodi fini ne'ebé mak ami produs, ami fa'an hodi rai osan, empresta osan, depois sosa sira nia motor, kareta, halo uma, depois selu oan nia eskola", nia hateten.

Kona-ba asuntu apoiu formasaun, SEKoop, Elizário Ferreira hateten, Kooperativa Kréditu Asosiasaun Naroman (KAN), sira iha inisiativa ida diak no presiza hetan atensaun hodi kria kondisaun oinsá mak atu bele dezenvolve tan atividade fini hodi fasilita di'ak liu tan ba ita-nia populasaun sira hotu.

"Hanoin katak ba oin Sekretária Estadu Kooperativa sei fasilita formasaun, edukasaun ba sira atu bele nakfilak ba kooperativa, ho kooperativa ida ne'ebé maka sustentável no iha estabilidade finanseira ba sira nia kooperativa rasik", Elizário hateten. (*)