Prezidente KKUE hateten, sira iha inisiativa, vontade no kreatividade, maibé sira seidauk bele jere mesak kooperativa atu la’o ba oin.

"Ita iha ona osan, maibé husu nafatin ba sekretáriu estadu atu bele fasilita ami ba kontinuasaun ba treinamentu, liu-liu iha akontabilidade, atu hasa'e ami nia koñesimentu oinsá bele iha responsabilidade finanseira ba kontribuisaun sira hotu iha membru ninian", Emanuel Lobato hateten lia hirak ne’e durante serimónia posse ba membru sira iha sede suku Leorema, postu Bazartete, munisípiu Likisá, Sábadu (05/12).

Nia dehan, sira ne’ebé tur iha estrutura, halo hela servisu ba ema lubuk ida nia osan, sira iha responsabilidade másimu ba ema hotu nia konfiansa liu-liu ba membru sira nia kontribuisaun, maibé sira seidauk iha kapasidade atu jere kooperativa.

"Tanba ne'e, ami husu mós ba sekretáriu estadu, karik iha kondisaun ruma bele prepara netik ajente ruma ba ami oinsá bele jere kooperativa ne'e, hafoin ami iha esperiénsia, ami bele la'o mesak", nia dehan.

Nia hatutan, KKUE halo servisu ba ema hotu, tanba ne'e nia husu ba Leorema oan sira hotu atu evita interpretasaun falsu oioin ba servisu kooperativa nian, tanba laiha motivu, tendénsia no interese ruma atu lori membru sira ba grupu seluk.

"Ha'u husu ba ita hotu atu evita interpretasaun sira ne'ebé livre ho vontade. Ikus liu, ha'u lori estrutura no membru tomak, husu ita hotu nia servisu nu'udár dalan di'ak liu ba kooperativa, bele buras no buras liu ba futuru ita hotu nian", nia fó hanoin.

Entretantu, poupansa orsamentu ne'ebé membru sira tau hamutuk mak hanesan, rai osan administrasaun $10, rai osan obrigatóriu $5, no rai osan prinsipal $10, hamutuk membru ida hatama $25.
KKUE rai osan ba dahuluk totál membru hamutuk na'in 22, ho orsamentu totál $545. (*)