PR deklara asuntu ne’e liuhusi diskursu komemorasaun loron proklamasaun independensia ba dala 45 iha Pilila Munisipiu Likisa, Sábadu (28/11).
“Relasionadu ho “hadau malu” Meza Parlamentu Nasionál ne’ebé mak akontese iha fulan-maiu tinan ida-ne’e, iha opiniaun balu afirma katak Prezidente Repúblika nonok hela no ne’e sinál katak Prezidente Repúblika konsente hahalok “hadau malu” podér iha Parlamentu Nasionál. Opiniaun balu dehan katak mosu asaun inkonstitusionalidade no ilegalidade maibé Prezidente Repúblika la ko’alia buat ruma. Prezidente Repúblika laiha kompeténsia atu julga kona-ba mosu ka la mosu asaun inkonstitusionál ka asaun ilegál. Akontesimentu ne’ebé mak mosu iha loron 18 no 19 fulan-maiu 2020 tanba mós ejiste diverjénsia interpretasaun kona-ba ita-nia Konstituisaun no lei oan sira ne’ebé regula funsionamentu Parlamentu nian”, PR Lú Olo hateten.
Xefe estadu ne’e dehan, Jurisprudénsia Tribunál Rekursu nian kona-ba akontesimentu iha Parlamentu durante loron rua iha momentu ne’ebá hatudu katak tuir Rejimentu Parlamentu nian, Plenáriu Parlamentu nian mak fatin ne’ebé apropriadu ba parte ne’ebé la satisfeitu atu halo kontestasaun ba destituisaun no eleisaun Prezidente Parlamentu iha momentu ne’ebá.
“Jurisprudénsia ne’ebé refere afirma mós katak destituisaun no eleisaun Prezidente Parlamentu nu’udar actu polítiku. Tan ne’e, labele sai objetu ba kontrolu judisiál kona-ba konstitusionalidade”, PR Lú Olo subliña.
Nia hatutan, Jurisprudénsia ne’e fó indikasaun katak Tribunál “rekoñese” desizaun polítika ne’ebé mak maioria Deputadu sira foti ona iha loron 19 fulan-maiu tinan 2020.
“Ita bele la konkorda ho Tribunál ninia opiniaun tanba ita iha ita-nia pontu-de-vista rasik maibé ita labele deskredibiliza Tribunál ninia knaar tanba la konkorda desizaun ruma hosi Tribunál”, nia fó hanoin.
Bainhira mosu alterasaun ba kompozisaun maioria parlamentár foun, Primeiru-Ministru halo remodelasaun ba Governu. Prezidente Repúblika aseita nomeasaun no fó pose ba Membru Governu sira tanba VIII Governu hetan sustentasaun hosi maioria partidu sira iha Parlamentu. (*)
PUBLISIDADE