Relasiona ho kazu ne’e, iha Kinta (17/09), Xefe Suku Buleur Guido Ramos Robeiro hamutuk ho xefi aldeia sira deside hasoru malu ho reprezenta povu iha  Parlamentu Nasional (PN).

Hafoin sorumutu ne'e, Xefe Suku Guido informa, sira mai hasoru-malu ho deputadu sira iha PN hodi hato'o kestaun balun relasiona ho sira-nia populasaun husi aldeia 4 ne'ebé naran lakon iha MSSI.

"Ohin ha’u ho ha’u-nia xefi aldeia na’in tolu, ami hato'o ba deputadu sira kona-ba osan covid-19 nian, ami-nia suku Buleur, aldeia 4 naran lakon total. Tanba ne'e ami hato'o ba komisun A atu hato'o ba governu par tempu badak selu ami-nia ema sira ne'e," dehan Xefi Suku ne'e iha PN, Kinta (17/9).

Nia dehan, molok hasoru-malu ho deputadu PN, nia parte hato’o ona kestaun ne’e ba autoridade munisipiu, maibé seidauk iha solusaun.

Entretantu, prezidente Komisaun A trata asuntu justisa no konstituisaun Joaquim dos Santos promete sei hato'o kestaun ne’e ba governu hodi verifika lista hirak ne'e, nune'e bele halo pagamentu.