Ekipa task force ne’e kompostu husi Polísia Nadional Timor-Leste (PNTL) no Saúde Munisipal no Autoridade Munisípiu.
"Agora dadaun ami kria ekipa task force ba covid-19, desizaun hotuhotu kona-bá covid-19 la’ós de’it Admistradór mak foti maibé husi ekipa task force ne'ebé nia Prezidente lideradu husi Admistradór Munisípiu, entaun buat ruma Admistradór mak sei asina”, dehan Domingos ba www.tempotimor.com via telemóvel, kinta (25/03).
Ekipa task force covid-19 ne'ebé kria halo servisu ho kondisaun ne'ebé mak iha hanesan halo sosializasaun ba komunidade atu komprende kona-bá prevensaun Covid-19 liuliu aviza atu komunidade uza máskra, kria distánsia sosial inklui fase liman ho sabaun.
Maibé, ekipa task force covid-19 nia servisu balun kona-ba karta autorizasaun viajen hanesan bainhira pesoál ne'ebé atu viajen husi Lautein ba Dili, ekipa task force covid-19 Munisípiu Lautém sei haruka dokumentu ba SIJK depois sei iha karta akonpanãmentu husi Autoridade Munisípiu no PNTL Lautein.
"Agora dadaun pesoál sira ne'ebé atu ba Dili, ninia dokumentu sira ita manda ba sentru jestaun krize, aprova hotu tiha manda fila mai Munisípiu depois print out tiha sei halo karta akonpanãmentu ida husi Admistradór munisípiu no Komandante (PNTL) Munisípiu hafoin sira bele tama Dili”, dehan nia.
Enkuandu pesoál sira ne'ebé viajen to’o de’it iha Metinaro presiza de’it autorizasaun no assinatura husi Admistradór munisípiu no komandante PNTL munisípiu. Maibé pesoál balun ne'ebé atu halo viajen husi Dili ba Lautein presiza iha dokumentu kompleitu hanesan sertifikadu livre Covid-19 husi SIJK.
"Agora dadaun bainhira ema tama mai iha ne'e (Lautein) ami presiza ema iha sertifikadu livre Covid-19 nian”, dehan Domingos.
Antes ne'e, Autoridade Munisípiu Lautein rasik provizóriumente deside hapara atividade ne'ebé halibur ema barak to’o loron 29 fulan-marsu hafoin mosu suspeitu pozitivu covid-19 hanesan suspende ema halibur malu iha grupu barak hanesan futu-manu, tipu jogu oinoin, treinu inklui lia mate-moris tuir tradisaun no kontrola sirkulasaun ema tama-sai iha área turistiku sira.(*)
