Dadaun ne'e Munisípiu Lautein instala seguransa no pesoál saúde iha portaun haat hanesan Laivai, Luro ne'ebé ligadu ba Atelari-Laga Baukau, parte Iliomar mak portaun rua hanesan iha aldeia Larimina ne'ebé ligadu ba Baguia-Baukau no Irabere liga ba Uatu-Karbau Vikeke.
"Ekipa ba monta ona be iha ne'ebá depois monta mós postu ba PNTL no pesoál Saúde iha ne'ebá”, dehan Domingos ba www.tempotimor.com via telemóvel, kinta (25/03).
Domingos husu atu Lauteinoan kumpri no halo tuir despaixu ne'ebé antes ne'e fó sai ona hanesan, suspende ema halibur malu iha grupu barak futu-manu, tipu jogu oinoin, treinu inklui lia mate-moris tuir tradisaun no kontrola sirkulasaun ema tama-sai iha área turistiku sira.
"Ami esforsu maka’as liu iha sosializasaun, halo povu komprende didi’ak para sira disiplina halo tuir protokolu covid ne'ebé iha ho vizilansia másimu, ema seluk ne'ebé mai husi rai ka fatin seluk obrigatoriumente tenke fó hatene lider komunitária sira para ita foti para evita problema” afirm nia.
Munisípiu Lautein rasik deteta kazu pozitivu Covid-19 ida (1) bainhira suspeitu estudante husi Universidade Oriental (Unital) halo viajen husi Dili iha loron 18 Marsu hela iha aldeia Reisoru suku Home, Lospalos vila.(*)