Elizariu hato’o kestaun ne’e bainhira partisipa iha semináriu nível postu ida ho tema "Dezenvolve Ekonómia Lokál Iha Kooperativa", ne'ebé organiza husi Kooperativa Kréditu Uniaun Naunil (KKUN), iha salaun postu administrativu Iliomar, munisípiu Lautém.
"Konkluzaun mak ne'e, ha'u hanoin ba oin ita projeta, husu ba komunidade sira, ba autoridade lokál sira, atu ba fó hatene ba imi nia povu sira, imi bele hari'i grupu iha nível suku laran hodi hamosu kooperativa de produsaun", hatete Sekretáriu Estadu Kooperatiba (SEKoop) Elizário Ferreira iha salaun Administrasaun Postu Administrativu Iliomar, Kinta (22/10).
Nia dehan, intermus finanseira, autoridade lokál sira organiza grupu sira no haruka tama iha Kooperativa Kréditu Uniaun Naunil (KKUN), depois nakfilak nia sai hanesan sentru.
"Kooperativa produsaun ne'e, sei asesu ba nia bele halo armájen, para imi nia produtor sira tau imi nia produtu karik, bele tau iha ne'eba para ema husi munisípiu seluk mai foti, tau iha ne'ebá", dehan nia.
Nia mós husu ba povu Iliomar atu bele loke loja, ezemplu bainhira ema presiza masin-midár, bele ba foti, inklui lori mós produtu sira hanesan modo, nú, ba tau iha loza.
Maibé, bainhira presiza osan, sira bele foti osan, sé presiza masin-midar, kafé, bele troka de'it, sé laiha kafé, liuhosi kooperativa, Ermera bele lori produtu kafé.
Nia hatutan, liuhosi atividade sira ne'e mak parte kooperativa bele sai hanesan sentru ida ne'ebé halo distribuisaun ida di'ak, atu ita labele depende bebeik ba nasaun liur sira hanesan Vietnam no Bangkok.
"Kooperativa sira ne'e fó solusaun atu bele la'o ba to'o ita nia rain. Ba oin produtu hotu-hotu konsentra iha kooperativa Naunil, para bele aselera ita nia servisu sira", nia fó hanoin.