Tempotimor (Díli)- Durante Kooperativa Kréditu Uniaun (KKU) Naunil eziste, hahú iha tinan 2011 too 2020, dadaun ne'e, kompleta ona ba tinan sia (9), konsege akomoda ona kapitál finanseira ho montante Dollar Amerikanu Rihun Atus-ida (U$.100 mil) nune'e mos ho nia membru hamutuk ema 116.
Prezidente Kooperativa Kréditu Uniaun (KKU) Naunil, Luis Fernandes informa, ezisténsia kooperativa Naunil, iha tinan 2011 no dadaun ne'e, iha ona membru hamutuk 116 ne'ebé fó ona kréditu lubuk ida, ba nia membru sira no hetan kréditu ne'ebé ho susesu.
"Durante eziste, ami-nia kooperativa ne'e ninia área ne'e ida de'it, ba rai osan no fó osan ba ema foti ka deve i fó fila. Ida ne'e de'it, maibé kada ema ida besik ona $.800 kada membru", hatete Prezidente Kooperativa Kréditu Uniaun (KKU) Naunil, Luis Fernandes ba jornalísta sira, iha Salaun Administrasaun Postu-Administrativu Iliomar, munsípiu Lautem, kinta (22/10).
Nia esplika, sira hanaran Kooperativa Kréditu Uniaun Naunil, tanbá iha Iliomar foho ne'ebé aas liu mak, foho Naunil, tanbá ne'e mak sira iha esperansa boot, hakarak lori sira-nia kooperativa ne'e sai boot no aas, hanesan foho Naunil.
"Ida ne'e mak ami iha filozofia ida katak, iha Iliomar ne'e, foho Naunil ne'e mak aas liu i ami nia mehi mos loron ida kooperativa ninia dezenvolvimentu ne'e sei aas hanesan foho Naunil", nia argumenta.