Tempotimor (Díli)-Pesoál saúde ne’ebé responsável ba izolamentu husik livre pasiénte sira iha kuarentena Tasitolu joga karta.

Pasiénte covid-19 ida iha izolamentu Tasitolu ho inisial EQdC, ba www.tempotimor.com katak, durante sira tama iha izolamentu Tasitolu, laiha regra ruma mak bandu sira oinsá halo distansiamentu sosial no fiziku.

"Ami tama iha ne'e, livre hela, balu halimar joga karta tan, balu voleibol ho tebe bola", informa nia liuhusi telefone, sábadu (01/05).

Bainhira sira tama iha izolamentu Tasitolu, pasiénte labele halo asaun ruma hasoru médiku sira, tanba ameasa sei halo extensaun ba prazu tempu bele to'o fulan ida mak foin autoriza fila ba uma, maske tuir prazu tempu normál, to'o de'it loron sanulu-resin-haat iha izolamentu.

"Iha ne'e, ema balu tama kleur ona, balu to'o fulan ida liu ona, maibé seiduak sai, tanba kontra doutor sira", haktuir nia.

Iha loron 27 fulan-maiu, nia de deside ba halo teste swab iha Sentru Kovensaun Díli ho razaun atu hala'o atividade servisu móvel iha Munisípiu sira.

Maibé, iha kinta (28/04), bainhira nia ba rona fali rezultadu husi médiku sira, hatudu pozitivu covid-19, nune'e ambulánsia, transporta kedan ba kuarentena Tasitolu.

Kona-ba hahán, sira sempre tuir oras normál, matabisu kafé ho paun, meiudia tuku sanulu resin-ida liu, hahú almosu, no tempu kalan.(*)