Tempotimor (Dili)-Bankada Congresso Nacional de Reconstrução de Timor (CNRT), Deputada Veneranda Lemos krítika Governu liliu Ministériu Saúde (MS) husik pasiénte infetadu Covid-19 hamutuk 64 iha munisípiu Baukau hela ho foer.

"Sala izolamentu ne'ebé Governu halo iha estadiu Baukau ninian. ema hamutuk 186, depois de halo teste swab ba sira, iha 64 mak pozitivu, maibé kondisaun iha fatin ne'ebá la dignu. Casa de Bainho laiha, ema moris hanesan iha de'it foer nia leten, hahán ne'ebé fó ba sira mós, hahán ne'ebé la di'ak", deklara nia iha plenária Parlamentu Nasionál (PN), tersa (31/08).

Bankada CNRT hetan infornasaun no ida ne'e husi Autoridade Lokál ne'ebé ba observa direta kestaun ida ne'e iha Munisípiu Baukau.

Maibé kestaun seluk ne'ebé CNRT hakarak sita fali tán mak (Lend-Line) ne'ebé mak Governu fó sai katak bainhira ema ruma ne'ebé vasina ona mak hetan sintomas ruma, bele bolu ba (Lend Line) ho númeru 119, maibé realidade (lend lane) ida ne'e la funsiona tanba ema liga ba liga laiha ema ruma mak hatan.

Xefe Bankada PD, Antónino da Conseição "Kalohan", konsidera kondisaun ne'ebé mak Ospital Nasionál Guidu Valadares (HNGV) liliu sala Izolamentu Lahane no Vera Cruz dadauk sei mínimu tebes.

Maibé ho kondisaun ka inkuantidade ida ne'e la siknifika atu difikulta fó asisténsia ba ema moras.

"Atu fahe de'it, esperiénsia ida dehan katak, situasaun ida ne'ebé mak iha Lahane, iha mós Vera Cruz ne'ebá, pratikamente ba situasaun ne'ebé mak gravé los tiha ona", dehan nia.

Husu ba sidadaun hothotu ninia apoiu, atu nune'e bele hakma'an mós alstramentu ka kontajiu husi Covid-19, hodi bele salva ema husi moras ida ne'e.

Hatan ba kestaun ne'e Prezidente Parlamentu Nasionál (PN), Aniceto Longuinhos Guterres Lopes hatete, kestaun hirak ne'ebé koloka husi deputadu sira liliu kona-bá kestaun Covid-19 no fronteira, meza sei haruka ba Governu atu toma konsiderasaun. (*)

Tempotimor (Dili) – Problema igualidade jéneru iha Ministériu Obras Públiku (MOP), sai preokupasaun deputada Veneranda Lemos Martins no Maria Barreto, iha audiénsia ho MOP, Salvador Pires hamutuk ho ninia komitiva, Segunda (25/10/19) iha Parlamentu Nasionál.

“Señor ministru nian komitiva tuur iha oin ne'e, ha'u triste tebetebes. Tanba, Timor-Leste ne'e, investe barak tebes ba asuntu igualidade jéneru no TL hato'o ninia relatóriu iha komíte CEDAW kada tinan. Maibé, ita boot zero kortadu atu haree ba asuntu jéneru," dehan deputada husi Bankada CNRT ne'e iha audiénsia.

Deputada ne'e dehan, nia preokupa tebes ho igualidade jéneru iha Ministériu Obras Públiku (MOP) nian. Tanba, durante audiénsia ho komisaun C, D, E, F iha salaun plenária PN ne'e, husi MOP nia komitiva maioria mak mane. Feto ida de'it.

"Ida ne'ebé tuur iha oin ne'e feto ida de'it. Seraké ita Timor-Leste ne'e laiha feto mak matenek atu partisipa iha Obras Públiku ninian? Ka asuntu Obras Públiku ne'e ba asuntu mane de'it? Feto kapasitadu ita boot hasai hotu tiha? Triste. Feto kapasitadu ita boot hasai hotu tiha husi ita boot nia gabinete no ministeriu," dehan membru Komisaun F ne'e.

Entretantu, deputada Maria Barreto husi bankada CNRT mós lamenta ho igualidade jéneru nian iha MOP, tanba relatóriu laiha feto mak hetan benefisiáriu ba obra sira.

"Implementasaun deklarasaun Maubessi ne'e, to'o iha ne'ebé ona? Oinsá ita boot nia koordenasaun ho Sekretária Estadu Igualidade no Inkluzaun (SEII). Ema na'in hira mak hetan benefísiu? Tanba, ha'u haree iha livru rua, ha'u  la hetan indikador husi feto mak sai benefísiu iha projetu sira," dehan Maria.