Tempotimor (Dili) - Relasiona ho rezignasaun Kay Rala Xanana Gusmão husi kargu Xefe Negosiadór ba Delimitasaun Fronteira Tasi Timor, la fasil atu hili ema foun ba pozisaun ne'e.

"Atu hili ema ne'e la fasíl, la'ós tuur-tuur hili kedas, maibé ita sujere ba governu atu haree ema ruma ne'ebé didi'ak iha koñesimentu," dehan Diretór Ezekutivu FONGTIL, Daniel Santos do Carmo, ba Tempotimor.com, iha nia knaar fatin Kaikoli, Dili, Segunda (20/07).

Nia dehan, atu troka de'it ema hotu bele, maibé presiza hili ema ne'ebé matenek.

"Estadu bele servisu, maibé di'ak liu hili ema ida ne'ebé iha koñesimentu kona-ba asuntu ne'e, tanba ita-nia amigu Austrália ne'e zigante, entaun oinsá mak ita atu kuidadu, nune'e la fó implikasaun negativu," nia tenik.

Daniel mós fiar katak, Xanana Gusmão sempre apoiu kualkér ema ne'ebé troka.

Antes ne'e, Ministru Petróleu no Minerais (MPM), Conceição Soares, deklara laiha kompeténsia atu nomeia ema seluk ba fatin ne'e.

“Ba ha’u pesoál ne’e laiha kompeténsia, partidu tolu mak halo koligasaun ba ida ne’e, ne’ebé ha’u hanoin di’ak liu ba husu nivel koligasaun,” dehan nia ba jornalista sira, iha edifísiu Ministériu Finansas, Ai-Tarak Laran, Tersa (14/7).

Nia mós dehan, polítika ne’e desizaun husi partidu koligasaun nian, maibé téknika ne'e Ministru Petróleu bele foti desizaun.

“Buat ida polítika ne’e koligasaun ninian, mas teknikamente ne’e Ministru Petróleu no Minerais mak deside," tenik nia.

Tanba ne'e, MPM iha nia estrutura hanesan Timor GAP ne’ebé atu halo negósiu iha tasi kona-ba mina-rai nian, Autoriedade Nasionál Petróleu no Minerais (ANPM) ne’ebé atu regula invetidór sira inklui Institutu Petróleu no Jeolójia (IPJ) ne’ebé halo peskiza ba rekursu naturais sira.

"Buat hotu agora la’o di’ak hela, ne’ebé buat ida kona-ba tékniku ne’e la depende ba maun boot, ne’ebé depende ba maun boot ne’e buat polítika,” dehan Ministru Víctor.

Governante ne’e mós dehan, atu lori kadoras mai Timor Leste ne’e, objetivu timoroan hotu-hotu nian.

Nia esolika, atu lori kadoras mai TL ne’e uluk povu hotu-hotu hamriik halo protestu iha fatin-fatin, maibé kadoras atu mai TL ne’e mak presiza estrutura.

Antes ne'e, Konsellu Ministru bazeia ba proposta Ministru Petróleu no Minerais, Vitór da Conceição Soares, ezonera no Prezidente Timor GAP, hodi substitui fali ninia vise ba pozisaun topu ne'e.

Nune'e, liu loron ida, Xefe Negosiadór ba Delimitasaun Fronteira Marítima, Kay Rala Xanana Gusmão, mós deklara rejigna-aan husi ninia pozisaun ne'e. Maski nune'e, seidauk iha diskusaun formál kona-ba ema ne'ebé atu ba pozisaun ne'e. (*)

Tempotimor (Dili) – Forum Organizasaun Naun Governamental (FONGTIL) predisaun, bainhira governu foti Orsamentu Jerál Estadu (OJE), liu husi Rendimentu Sustentável Estimativa (RSE), osan husi fundu mina rai sei hotu iha 2037.

"Ha'u hakarak haree, tansá Primeiru Ministru dada fila proposta OJE 2020. Kuandu iha Jornada Orsamentu, Ministra Finansas mai ho senariu tolu. Maibé, ita haree foti osan ne'e sees husi fali senariu ne'ebé aprezenta," informa Diretór Ezekutivu FONGTIL, Daniel Santos Carmo ba jornalista iha nia knaar Fatin, Kaikoli, Dili, Sesta (06/12/19).

Daniel esplika, senariu tolu tuir Ministra Finansas informa, ida mak foti orsamentu tuir Rendimentu Sustentável Estimativa, fundu petrolífeiru nian, segundu mak orsamentu billaun $1.3 no terseiru billaun $1.6.

"Kuandu foti ona osan husi fundu minarai liu billaun $1.6 ba leten ne'e, osan mina sei hotu iha tinan 2037," tenik nia.

Daniel relata, levantamentu ne'ebé governu agora halo ne'e, bele dehan katak, sees husi senariu tolu ne'e hotu. Tanba, governu foti kedas sae ba $1.95.

Kuandu governu halo levantamentu liu ona RSE, Daniel sujere, tenke halo justifikasaun, atu bele iha balansu investimentu no seitór produtivu.

"Ita haree iha proposta OJE 2020 ne'ebé retira ona husi parlamentu, osan ba Bens Servisu boot liu fali Kapital Dezenvolvimentu. Ida ne'e la garanti ba RSE fundu minarai," Daniel esplika.

Tempotimor (Dili) – Sosiedade sivíl iha Timor-Leste husu ba membru Governu daualu ne'ebé seidauk hetan pose, bele hakat tuir Xanana Gusmão nian ain fatin, ne'ebé deklara rejigna-an.

"Ba membru Governu na'in sia (9), ne'ebé la hetan posse husi Prezidente Repúblika (PR) Francisco Guterres Lú Olo, di'ak liu hola pozisaun ruma ka rejigna-an, hanesan ezemplu ne'ebé Xanana Gusmão hatudu tiha ona. Kuandu nia la simu pose, nia rejigna-an. Agora, Xanana bele halo, tanba saida mak sira seluk labele," dehan Diretór Ezekutivu Fongtil, Daniel Santos do Carmo iha CCD, Kinta (24/10/19).

Iha fatin hanesan, membru Asia Justice and Rigths (AJAR) Inocencio Xavier katak, CNRT tenke haree tuir KHUNTO ne'ebé troka ona nia membru Governu.

"CNRT tenke haree ba partidu KHUNTO ne'ebé troka ona lista ne'e. Tanba, lista pendente husi CNRT mak barak. Entaun, husu ba señor Xanana Gusmão, katak tenke iha paixaun atu substitui ona membru sira ne'e. Labele tan de'it ema na'in 9, sakrifika ema miliaun. Ida ne'e, labele," dehan Inocencio.

.