Tempotimor (Dili) - Sentru Integradu Jestaun ba Krize (SIJK) konkorda ona ho família hodi halot mate isin Covid-19 OM iha Semitériu públiku Bekussi, aban loron sesta (23/04).

Koordenadór Destakamentu Reasaun Rápidu, Aurelio Sérgio Cristóvão Guteres hatete, ekipa jestaun óbitu ne’ebé kompostu husi Pilar I, Pilar II, Pilar VI, Ministériu Saúde nian inklui mós Ministériu Solidaridade Sosiál, Cruz Vermella Timor-Leste, vistu jestaun ekipamentu Obras Públikas konvoka reuniaun ho família matebian, hothotu konkorda ona, oinsá bele halot matebian ne'ebé foin hakotu iis iha Vera Cruz.

"Ohin ami ho família konkorda hakoi iha Semitériu públiku Bekussi no sei prepara rate, kaisaun ba ona iha Vera Cruz, depois hakoi tuir ita-nia kultura, tuir buat sira ne'e hotu”, dehan nia liuhusi telefone, kinta (22/04).

Matebian ne’e sei halot tuir prosesu protokolu Organizasaun Mundial Saúde no Ministériu saúde ne’ebé adopta.

Entretantu, Oan husi matebian, Evanjelista Mendonça Amaral, informa sira-nia parte halo enkontru ona ho SIJK, hodi deside matebian ba hakoi iha Semitériu pùbliku Bekussi

"SIJK deside ona katak, aban dadersan tuku hitu sei lori matebian ba tau iha uma oras ida, depois mak lori ba halot iha Bekussi", dehan nia. (*)