Tempotimor (Dili) – Ho razaun laiha labóratoriu hodi halo análize, AIFAESA, Ministériu Agrikultura no Peskas (MAP) inklui Ministériu Saúde (MS), labele deteta foos plástiku ne'ebé tama iha rai-laran.

Ba jornalista, Koordenadór AIFAESA, Abilio José Sereno rekoñese, kestaun seguransa ba ai-han ne'ebé sirkula iha rai-laran sai preokupasaun ba ema hotu-hotu. Tantu, ukun na'in sira.

"Atu halo konkluzaun no fó resposta loloos ne'e, presiza instrumentu sientífiku hanesan laboratóriu mak bele indetifika katak, produtu ne'e di'ak ka falsifikadu ka plástiku. Maibé públiku hatene, durante asisténsia AIFAESA to'o agora laiha laboratóriu ne'ebé AIFAESA labele halo buat ida," dehan Abilio iha edifísiu AIFAESA Kaikoli, Kinta (07/11/19).

Abilio haktuir, informasaun ne'ebé sai iha facebook katak, foos ho marka Globus te'in tiha sai fali plástiku iha loron balun nia laran.

"Akontesimentu ne'e fó sai husi facebook katak, foos ida marka globus ne'e katak, señora ne'e te'in foos ne'e sai tiha etu, depois liu loron haat, nabeen tiha depois sai fali plástiku. Ne'e ita bele dehan katak komik. Maibé, hanesan instituisaun ida, AIFAESA iha obrigasaun atu servisu hamutuk ho MAP no MS, hodi responde ba preokupasaun ne'e," dehan Abilio.

Iha fatin hanesan, Xefe Depertementu Toxicology Laboratóriu Nasionál Ministériu Saúde, Gaspar Pinto katak sira-nia knaar mak halo kontrolu ba kualidade bee, ai-han, aimoruk, alkóliku, mina no seluk tan, ne'ebé sidadaun Timor-Leste utiliza iha Timor Leste," dehan Gaspar.

Hatán ba kestaun ne'e, Gaspar komenta, sira-nia parte la'ós lakohi halo asaun ba kestaun ida ne'e. Maibé, ekipamentu reazente ne'ebé atu apoiu servisu mak laiha kualidade.

"Kona-ba ekipamentu ne'e, la'ós dehan laiha. Maibé, laiha osan atu hola ekipamentus reazente hodi apoiu ami para servisu di'ak ba nasaun Timor-Leste. Ida ne'e mak seidauk iha," nia tenik.

Alende ne'e, reprezentante husi Ministeriu Agrikultura no Peskas (MAP), Xefe Depertementu Produsaun Alimentar no Jestaun Pos-kolleta, Suzana C Vilanova katak, MAP laiha laboratóriu atu halo análiza kona-ba kestaun ne'e.

"Kona-ba foos aat ka plástiku ne'e, realidade duni. Mas, ita laiha laboratóriu atu teste ba produtu hirak ne'e nia kualidade," dehan Suzana.

Nia afima, kada tinan parte relevante hamutuk ho ajensia husu Governu atu tau atensaun ba laboratóriu, maibé to'o agora laiha.

“Entaun, bainhira mak ita bele estabele laboratóriu kiik ida, hodi halo teste ba produtu sira ne'ebé tama mai Timor-Leste," nia dehan.