Login to your account

Username *
Password *
Remember Me

Items filtered by date: Wednesday, 25 December 2019

Tempotimor (Dili)-Konfuzaun mosu iha prosesu tenderizasaun ne’ebé Sekretariu Estadu Formasaun Profisional no Empregu (SEFOPE) loke, tanba desizaun ba manan-nain ne’ebé fó sai hamosu deskonfiansa balun ba intensaun ne’ebé autoridade iha SEFOPE iha.

Iha 22 Agostu 2019, SEFOPE loke prosesu tenderizasaun ba konstrusaun Mini Edifisiu SEFOPE ho númeru NCB-001/SEFOPE/DGAF/VIII/2019 ne’ebé partisipa husi kompaña 5. Hafoin iha 9 Setembru 2019, Diresaun Nasionál Aprovizionamentu (DNA) SEFOPE anunsia kompaña 3 ne’ebé priense rekezitu mak Kompaña Biqueli Pala Unip Lda, Gaerenez Unip Lda, no Ponta Sakato Unip Lda.

Liu husi prosesu avaliasaun ba teknikal proposal no finansial, kompaña Gaerenez Unip Lda mak okupa númeru dahuluk ho valor teknikal proposal 199 ho total presu $160.000.00; kompaña Biqueli Pala Unip Lda okupa númeru daruak ho valor teknikal proposta 113 ho total presu $171.573.76; no kompaña Ponta Sakato Unip Lda okupa númeru ikus liu ho ho valor teknikal proposta 112 ho total presu $166.570.32.

Hafoin prosesu refere, ekipa juri avaliasaun rekomenda ba Sekretariu Estadu Formasaun Profisional no Emprego Julião da Silva hodi eskola no aprova kompaña ida entre tolu ne’e. Ikus mai, Sekretariu Estadu Julião deside hodi hili kompaña Ponta Sakato Unip Lda ne’ebé okupa númeru ikus liu ho scor ne’ebé kiik no valor osan boot liu.

Tuir loloos, bazeia ba valor teknikal score so kompaña dahuluk no daruak de’it mak ekipa Juri Avalisaun loke ninia proposta finanseiru, maibé realidade, ekipa juri loke hotu kompaña tolu ne’e ninia proposta finanseiru no entrega ba Sekretariu Estadu hodi eskolla.

Ho rezultadu tenderizasaun ida ne’e, iha 30 Outubru 2019, kompaña Gaerenez Unip Lda hato’o protesta ida ba SE Julião ne’ebé Cc ba Diretór Jeral Administrasaun no Finansas, José Asa, no Diretór Nasional Aprovizionamentu, Geraldo Moniz.

Iha karta ne’e, Diretora kompaña Gaerenez Unip Lda, Delia Araujo de Jesus hato’o protesta kona-ba prosesu avaliasaun ne’ebé la tuir dekretu Lei Aprovizionamentu númeru 10/2005, iha artigu 80, ne’ebé hatete atu aseita ka rezeita empreza husi prosesu tender ne’e bazeia ba kriteria sira iha dokumentus tender.

“Maibé haree husi kontestu ne’e, Instituisaun SEFOPE la halo tuir ona lei, tanba desizaun ne’ebé ita-boot (SE Julião) foti la halo tuir kriteria sira iha dokumentus tender.”

“Teknikalmente, ha’u-nia empreza nia valor tekniku boot liu no finanseiru kiik liu, maibé ita-boot (SE Julião) deside hodi ajudika empreza ne’ebé valor tekniku kiik no finanseiru boot,” deklara Diretora ne’e.

Delia sita mós Lei Aprovizionamentu númeru 24/2008, iha artigu 86 kona-ba evaluasaun no prosedimentu ajudikasaun nian. Iha paragrafu 11 hatete “envelope rua tenke loke bazeia ba lista shortlist primeiru no segundu.

“Signifika katak so bele loke proposta finanseiru husi empreza kualifikadu primeiru no segundu de’it. Maibé, iha tender ida ne’e ita-boot loke empreza 3 nia proposta finanseiru. Tanba saida ita-boot loke fali proposta finanseiru ba emprea kualifikadu terseiru?,” diretora ne’e kestiona.

Iha 4 Novembru 2019, SEFOPE hato’o karta resposta ba karta protesta husi Diretora kompaña Gaerenez Unip Lda, hato’o razaun balun relasiona ho prosesu avaliasaun ba tender ne’ebé loke.

Ba lamentasaun husi Diretora Gaerenez Unip Lda kona-ba tanba sa hili valor tekniku kiik no finanseiru boot, SEFOPE dehan, valor no finanseiru seidauk bele justifika kualidade konstrusaun.

“DNA klarifika katak tuir esplikasaun husi S.Excia Sekretariu Estadu, valor tekniku boot no finanseiru kiik seidauk bele justifika loloos nia kualidade konstrusaun di’ak duni ka lae, no mós valor tekniku kiik no finanseiru boot mós seidauk garantia kualidade konstrusaun di’ak, neduni hakarak ka lakohi S. Excia tenke hili ida, husi kompaña tolu ne’ebé priense kriteria iha prosesu open bid no avaliasaun teknika proposal,” esplika SEFOPE.

Iha karta ne’e, SEFOPE la hataan kona-ba kestaun Lei Aprovizionamentu númeru 24/2008 ne’ebé Dalia kestiona, maibé SEFOPE hataan de’it katak kompaña tolu ne’ebé pries kriteriu iha direitu hanesan atu manan iha rekomendasaun ne’e.

“Maibé kuandu valor tekniku boot bo finanseiru kiik mak tenke manan, komisaun la presiza halo rekomendasaun no komisaun deside direitamente hato’o ba S.Excia atu halo aprovasaun de’it.”

Iha karta ne’e SEFOPE mós husu ba Diretora Gaerenez Unip Lda atu responde liu husi karta eskrita ho durasaun tempu oras 24 nia laran.

Hatan ba kestaun ne'e Diretor Administrasaun Financas SEFOPE, Jose Asa dehan prosesu tomak la'o tuir prosedimentu.

"Konkursu ne'e ami halo tuir prosedimentu rejime jurídiku aprovizionamentu nian ne'ebé la'o, depois ami halo avaliasaun liuhusi komisaun avaliasaun dokumentus, par bele hetan nia rezultadu avaliasaun ne'ebé di'ak, tanba ne'e ami halo tiha ona, sira komisaun avaliasaun dokumentus mós halo tiha ona sira nia servisu, halo tiha ona relatóriu ba sua eselénsia, para sua eselénsia bele aprova relatóriu ne'e para oinsa bele hala'o servisu ba ami nia mini edifísiu ne'e," Jose Asa dehan ba tempotimor.com.

Nia esplika, "iha artigu balun fó hela direitu ba kompañia balun ne'ebé mak la satisfaz ka la simu rejultadu sira bele kontesta, ne'ebé sira mós halo hela karta para oinsa sira mós bele hetan aplikasaun di'ak liután husi komisaun avaliasaun."

Hafoin simu karta refere, iha loron ne’e kedan, Kompañia Gaerenez Unipesoal Lda hato’o karta dala ida tan no deklara sei kontinua ezije hodi buka lia loos no prontu atu prosesu tuir prosedimentu legal ne’ebé iha.

Ho protestu no “ameasa” refere, SEFOPE rekoñese ninia erru hodi kansela no re-tender fila fali.

"Ami retender fila fali, maka ikus liu mak iha kompañia rua de'it, kompañia Carame no Gaerenez," hateten Diretor Administrasaun Financas. 

Iha prosesu re-tender iha Novembru 2019, iha kompañia 5 mak submete dokumentus no iha de’it kompañia 3 mak priense rekezitus prosesu abertura proposta nian mak kompaña Carame Unipesoal Lda, Gaerenez Unipesoal Lda, no K-6 Unipesoal Lda.

Liu husi prosesu avaliasaun preliminaria no detalla iha kompaña rua mak loke proposta finanseiru mak Kompañia Carame Unipesoal Lda ho teknikal score 250 ho presu $163,279.39, no Gaerenez Unpesoal Lda ho teknikal score 245 ho presu $159,046.40.

Tuir esplikasaun fonte balun ba Tempotimor.com, bainhira halo kombinasaun husi valor tekniku no valor finanseiru kompañia ne’ebé iha direitu atu manan mak Kompañia Gaerenez Unipesoal Lda.

“Aplikasaun formula tuir lalaok iha dokumentus tender nian mak: Kompañia Gaerenez Unipesoal Lda, Technical Score = 245/500X40= 19.6 Points, Financial Score = USD 159,046.40/USD 159,046.40 X 60 = 60 Points, Total Valor tekniku no Financeiru ( 19.6+60) = 79.6; ba Kompañia Carame Unipesoal Lda, Technical Score =250/500X40= 20 points, Financial Score = USD 159.046.40/163,279.39 X 60 = 58.4, no Total Valor Tekniku no Financeiru (20+58.4) = 78.4,” esplika fonte ne’e.

 

Bazeia ba rezultadu ne’e, ekipa juri hato’o ba SE Julião atu hili kompaña ne’ebé manan, no iha 4 Dezembru 2019, SE Julião deside hodi hili Gaerenez Unip Lda nu’udar manan-nain.

Maibé, tuir informasaun, parte Aprovisionamentu SEFOPE lakohi publika desizaun SE ne’e no iha loron 6 Dezembru 2019 ekipa Juri prepara fali relatoriu foun hodi haruka ba SE Julião atu aprova fali Kompañia Carame Unipesoal ne’ebé ho valor orsamentu boot kompara ho Kompañia Gaerenez Unipesoal Lda.

Ikus mai, iha 9 Dezembru 2019, SEFOPE anunsia katak manan-nain ba prosesu tenderizasaun ne’e mak kompañia Carame Unipesoal Lda.

Ho nune’e, iha 10 Dezembru 2019, Kompañia Gaerenez Unipesoal Lda hato’o fali protestu ba Diretor SEFOPE no Cc ba Sekretariu Estadu, Diretor Jeral, no Inspetora e Auditoria Interna SEFOPE, maibé to’o ohin seidauk iha resposta.

 

Published in Investigativu
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« December 2019 »
Mon Tue Wed Thu Fri Sat Sun
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31          

Tempo Timor Networks

Online Counter