Liuhusi karta Deklarasaun Konjunta Primeiru-Ministru Timor-Leste, Taur Matan Ruak, no Primeiru Ministru Austrália nian, Scott Morrison, ne’ebé www.tempotimor.com asesu iha loron segunda (21/02) katak, sorumutuk hala’o iha loron kinta (17/02) husi virtualmente.

Lider nasaun rua ne’e reafirma importánsia fundamentál relasaun bilaterál Austrália-Timor-Leste, no salienta katak tinan 2022 marka tinan ruanulu relasaun diplomátika entre Austrália no Timor-Leste.

Líder rua ne’e, simu ho di’ak espansaun kooperasaun substansiál entre país rua ne’e, hahú kedas husi vizita Primeiru Ministru Morrison mai Timor-Leste iha fulan-agustu tinan 2019.

Primeiru Ministru sira diskute kona-ba sira-nia apresiasaun ba amizade forte no metin entre povu Timor-Leste no Austrália, no hametin kompromisu ne’ebé país rua fahe iha defeza husi valór demokrátiku nian.

Primeiru Ministra, Taur Matan Ruak hato’o ninia apresiasaun ba apoiu abranjente Austrália nian hodi hatán ba COVID-19 iha Timor-Leste, ne’ebé inklui destakamentu ekipa asisténsia médika Austrália nian iha fulan-abril no fulan-setembru tinan 2021.

Tanba apoiu tomak ba programa nasionál vasinasaun nian iha Timor-Leste no fornese vasina Austrália nian ba doze primária no ba reforsu nian sira.

Ho ida ne’e, nasaun Austrália sai ona doadór boot ba vasina COVID-19 nian iha Timor-Leste, durante ne’e.  (*)