Tuir informasaun ne’ebé www.tempotimor.com asesu iha pájina ofisiál Pálasiu Sinzas, Vise-Ministru Saúde, Bonifácio Mau Coli dos Reis hatete, apoiu ne’e nu’udar sentidu solidariedade atu haforsa, hametin no mellora sistema nasionál saúde partikularmente hamutuk atu kombate pandemia COVID-19 iha Timor-Leste.
“Ministériu Saúde mós apresia tebes ba apoiu jenerosidade ne’ebé povu Japaun fornese no responde ba surtu COVID-19 ba aprovizionamentu karreta malirin, jeleira boot no ki’ik hodi tau iha armazein rejionál sira hanesan Baukau, Ainaro no Maliana atu hasa'e kapasidade iha nível sub-nasionál hodi kontribui ba melloramentu no hasa kapasidade sistema saúde nian”, dehan nia iha serimónia entrega apoiu iha SAMES, Kampun Alor, kinta (17/02).
Veikulu refrigeradór hirak ne’ebé fornese ba Servisu Autónomu Medikamentus Ekipamentus Sames (SAMES) ajuda tebes hodi mellora servisu distribuisaun ho di'ak no lais liu to'o iha armajen rejionál no fasilidade saúde sira hotu.
Ministériu Saúde mósrekoñese tebes UNICEF no parseiru sira nia kontribusaun no assisténsia hodi responde ba surtu COVID-19 iha kampaña vasinasaun ba labarik idade eskola no la eskola ho vasina Pfizer, no ba ema boot idade tinan 18 ba leten ho vasina AstrazeneKa no Sinovac.
Tanba ne’e, Timor-Leste atinje ona kobertura vasinasaun COVID-19 to'o ona 84.4% ba primeira doze no 71.4% segunda dose. Nune'e mós, labarik ho idade tinan 12 to'o menus husi tinan 18 hamutuk 37,651 mak simu ona primeira doze ba vasina Pfizer no labarik 30.221 ho idade hanesan maka simu ona vasina Pfizer ba doze dalaruak nian ka kompleta ona doze primeiru no doze segundu iha munisípiu Dili.
Ho uda ne’e, hatudu Timor-Leste nia kontibuisaun liuhusi vasina bele hamenus risku ba transmizaun no bele hasa'e imunidade komunitaria ka Herd Immunity.
“Ha’u haksolok tebes atu informa ba ita hotu katak ministériu saúde agora dadauk hala'o hela expansaun ba kampaña vasinasaun Pfizer ba labarik husi idade tinan 12 ba leten ba munsípiu 11 inklui RAEO. Ohin loron, Munisípiu Likisá hahú ona lansamentu ba kampaña vasinasaun ba vasina Pfizer. Ministériu saúde halo ona revizaun no atualiza Planu Nasionál Implementasaun Vasina COVlD-19 atu refleta ba expansaun vasinasaun COVID-19 ba idade menus husi tinan 18”, informa nia.
Haree ba SAMES, iha kapasidade hodi bele armajena vasina Pfizer pelumenus ho dose 400,000 iha refrigeradór ultra malirin iha momentu saida de'it, ministériu saúde simu ona primeira faze ho kuantidade 259.760 doze husi totál 1,26 millaun ne’ebé hola ho orsamentu DFAT liuhusi UNICEF.
Husi ne’e apela ba estrutura SAMES iha nível nasionál no rejionál atu tau matan ba fasilidade no ekipamentu sira hotu ne'ebé simu, nune'e bele utiliza iha tempu naruk nia laran hodi responde ba pandemia COVID-19 no hasa'e kobertura ba vasina iha Timor-Leste laran tomak nune'e bele hasses husi moras ne'e.
Partisipa iha Handover ne’e mak Embaixadór Japaun iha Timor-Leste, Masami Kinefuchi, Health Officer Unicef, Angelita Maria Gomes, Diretór Ezekutivu SAMES, Santana Martins no konvidadu sira seluk. (*)
