“Servisu atu lori vasina ba munisípiu sira seluk, ita lansa iha ne'e, otomatikamente munisípiu sira seluk mós implementa kampaña vasinasaun ne'ebé hanesan iha ne'e, ba munisípiu hothotu”, dehan Ministra Saúde (MS), Odete Maria Freitas Belo, iha eskola St. Inaçio de Loiola, Ulmera, Cassait, kinta (17/02).
Vasina Pfizer ba estudante iha eskola sira, maibé la haree de'it ba labarik sira ne'ebé eskola, tanba idade ida ne'e hahú 11 to’o 17 anos, Ministériu Saúde haree mós idade 11 to’o 17 anos maibé la eskola, ida ne'e mós alvu ministériu saúde nian.
“Ita iha 30 mill ital pesoál ne'ebé mak la'ós fó de'it ba sira estudante, maibé fó ba alin sira ne'ebé la eskola ho idade ne'ebé hanesan”, informa nia.
Kona-ba vasinasaun sei halo iha munisípiu hothotu, maibé dalaruma ninia lojistikamente vasina tenke to'o iha sira-nia fatin, ne’ebé sei aloka iha semana ida ne’e nia laran.
“Munisípiu seluk mós sei hala'o atividade ne'ebé hanesan, maibé lansamentu ne'e ita lansa iha ne'e”, esplika Odete.
Ministériu Saúde iha alvu atu atinje labarik Estudante 600 ne'ebé mak tenke vasina, sei kontinua halo vasina no lorloron enfermeiru médiku sira ne'ebé designadu mai iha ne'e, tenke mai halo vasina ba sira nune'e ema na'in-600 tenke hetan hotu vasina.
“Sim, ha'u hanoin sufisiente, ita iha vasina ne'ebé mak sufisiente atu kobre estudante sira, nomós labarik sira ne'ebé mak idade 11 até 17 anos la eskola, ho númeru ne'ebé ha'u dehan 30 ital mill pesoál”, katak nia.
Administradór Munisípiu Likisá, Antoninho da Silva Pinto hatete, iha tinan 2020 Timor-Leste enfrenta problema Covid-19, mak Governu implementa programa vasinasaun atu proteze nia povu husi moras Covid ne'e.
“Ita hatene katak iha 2020 enfrenta problema balun, problema Covid-19 ne'ebé afeta mundu tomak inklui Timor-Leste, taun VIII Governu Konstituisionál hola medida pozitivu balun hodi utrapasa”, deklara nia.
Nune'e, pobreza hatudu katak sinál pozitivu tebes mesmu ke moras ida ne'e daet ba bebeik husi transformasaun Covid ba variante Delta ikus fali muda ba Omicron.
“Entaun Governu iha Polítika no programa ida ne'e lansamentu ba vasinasaun Pfizer ne'e para, depois ita bele hala'o, e vasinasaun Pfizer ne'e alvu liu ba alin sira 12 to'o 18, ita bele hasa'e imunidade fizika pois sira bele iha forsa kbi’it hodi halo prevensaun hasoru Covid-19”, dehan nia.
Entretantu Diretór Koleziu St. inaçio Loiola, Cassait, Padre (Pe.) Izaias Abilio Caldas Jejuita hatete, labarik sira iha intusiazmu kahur ho tauk tanba vasina, maibé hanesan instituisaun edukativa ida sira kontente ba konfiansa ida ne'e.
“Ha'u-nia sentimentu mak ne'e, ami kontente ho konfiasa ida ne'e, no ida ne'e mós fó tan motivasaun mai ami espirasaun atu ami bele halo servisu di'ak liután iha área edukasaun atubele forma foinsa'e sira, foinsa'e sai líder futuru ba nasaun ida ne'e”, deklara nia.
Entretantu, totál estudan ba tinan ida ne'e iha Koleziu St. Inaçio Loiola hamutuk 827, pursentu 60 ba feto, mane pursentu 40 no estudante simu vasina Pfizer 500-resin. (*)
