Vise-Ministru Saúde, Bonifácio Mau Coli dos Reis, hala’o vizita ba fatin izolamentu Vera Cruz, Lahane, Tasi tolu no Sentru Saúde Formoza hodi haree direta pasiénte sira ne’ebé halo tratamentu, kuarta (09/02).

Tuir infomasaun ne’ebé www.tempotimor.com asesu iha pájina ofisiál Palásiu das Cisnzas katak, iha vizita ne’e atu observa direta hodi idefika fatin baixa ba pasiente moras dengue atu foti asaun imediatu hodi responde ba surtu dengue ne’ebé mak dadaun ne’e kazu aumenta sa’e iha kapitál Dili liuliu afeta ba labarik kiik-oan sira.

“Hanesan ita hotu hatene kazu dengue komesa aumenta fali iha loron rua ka tolu ninia laran, ne’ebé mak agora ne’e rezista ona pasiente hamutuk mill ital. Dengue Fever 110, Dengue Hemorrhagic Fever iha 91 no Denge Shock Syndrome hamutuk 80”, informa Bonifácio, hafoin halo vizita, kuarta (09/02).

Dadaun iha Vera Cruz ne’e pasiénte hamutuk 115 mak baixa, iha fatin balu ne’ebé mak agora mamuk, sira agora balu alta ona, husi Vera Cruz ne’e kuaze ke salva labarik ne’ebé mak alta ona ne’ebé mak mai ho kazu grave, maibé kuaze 700 ital mak rekoperadu fila ba uma.

“Agora komesa tama, maibé médiku sira iha ne’e ho esforsu makas fó nafatin tratamentu ida ke adekuadu, par nune’e bele salva labarik sira ne’ebé mak ho estadu grave”, dehan nia.

Ministériu Saúde deside ona hahú loron 10 fevereiru pasiénte kauzu husi moras dengue sei transfere ba Izolamentu Tasitolu Building A no B, Enkuantu Covid-19 mantein iha Building C.

"Pasiénte Covid-19 mai ho sintomas ne’e sei refere ba iha Tasitolu Building C, ba pasiénte dengue kontinua asegura iha sentru saúde sira tanba pasiénte sira barak mak presiza oksijenio no presiza asesibilidade no balu ita transfere bá Tasitolu Building A no B. Kondisaun sira hotu ita prepara hela, no númeru médiku sira mós ita rekruta tan, par atubele halo atendementu ba pasiénte sira”, afirma nia.

Ho kazu denge ne’ebé mak sa’e ministériu saúde husu konsiénsia komunidade nian mak inportante. “La’ós dehan saúde de’it, hanesan daudaun ne’e, ita halo fogin kuaze ke ita halo intervensaun maka'as, ho Abate, ita haree bee nalihun sira ita tau produtu kímiku sira ba ne’eba, par bele hamate dezemvolvimentu susuk ne’e iha ne’eba.

Tanba ne’e presiza involvimentu ema hothotu nian, liliu autoridade lokál sira, oinsá mobiliza populasaun atu la bele soe fo'er arbiru.

“Atu konkista ba prevensaun Covid-19 ne’e mak hothotu tenke vasina, no nafatin proteje ita-nia an liuhusi fase lima ho sabaun, uza hand sanitizer no uza máskara, ne’e hanesan meius ida ke adekuadu atu bele prevene moras ne’e husi ita-nia an”, hatete nia. (*)