Diretór Servisu Saúde Munisípiu Baukau, Domingos Reinaldo da Costa Guterres hatete, vasina Booster Pfizer ba terseiru doze nian ne'ebé lansa ona iha Munisípiu Baukau prioridade liu ba liña frente sira hanesan Falintil Forsa Defeza Timor-Leste (F-FDTL) no pesoál saúde, maibé ema na’in-217 mak simu vasina.
"Stock ita sei iha 62 vial, liña frente barak mak seidauk vasina, ko'alia kona-ba liña frente la'os saúde de'it, inklui ita boot sira jornalista," dehan Domingos iha kna'ar fatin Reamare, tersa (08/02).
Tanba ne'e, nafatin fahe informasaun ba ékipa liña frente sira ne'ebé seidauk simu vasina Booster Pfizer bele hakbesik aan ba fatin Servisu Saúde Munisípal Reamare atu bele simu.
"Ha'u hanoin booster ne'e, parte husi região Leste ne'e foin implementa iha Baukau ne'e, seluk hanesan vikeke, lospalos sira ne'e seidauk, semana kotuk sira Munisípiu seluk kontaktu mai atu vasina iha ne'e (Baukau)," nia hatete.
Enkuatu vasina Booster Pfizer lansa iha Munisípiu Baukau, hahú iha loron 27 fulan-janeiru tinan 2022 iha fatin primeiru Batallaun F-FDTL Lanud Baukau ne’ebé iha membru F-FDTL hamutuk na’in-122 mak simu uluk ona vasina, tanba atu ba hala'o servisu iha fronteira. (*)