“Apela mós katak amostra ne’ebé lori ba Austrália iha dia 28 de janeiru de 2022 hodi halo teste konfirmasaun ba variante Omicron iha Institutu Doherty Austrália konfirma katak ho Variante Omicron”, informa Koordenadora Jerál Surtu Covid-19, Ministériu Saúde, Odete da Silva Viegas, dehan Odete liuhusi komunikadu ne’ebé www.tempotimor.com asesu iha loron domingu (06/02).

Tanba ne’e, husu ba populasaun iha Dili laran nomós iha Munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, wainhira sente isin-manas, ka kakorok moras, ka inus-ben, ka mear, hodi bele hetan atendimentu husi profesionál saúde sira.

“Wainhira sedu liu hatene se vírus ne’e kona ita ka la’e, di’ak liu, hodi nune’e bele hetan atendimentu sedu liu, no prevene tama ba situasaun ne’ebé hanaran sindroma insufisiénsia respiratória aguda (SIRA), ka susar/difísil atu dada-iis”, dehan nia.

Husu ba populasaun iha Timor-Leste laran tomak, maske simu ona vasina, favór respeita nafatin regra prevensaun no ijiéne individual, ne’ebé Governu hatu’ur ona, atu prevene moras Covid-19 da’et ba mai. 

Ba prevensaun omicron iha regra sira ne’e, hanesan ema hotu hatene ona, uza máskara, fase liman beibeik ho sabaun ka dezinfetante ruma, evita kose liman ba matan, inus ho ibun, wainhira kumprimenta malu, la presiza ka’er liman, bensa-liman, rei-malu ka haku’ak malu, evita halibur malu barak, no hamri’ik ka tur do’ok husi ema seluk, mínimu metru ida ho balun. (*)