Família pasiente, Marcelina Belo Abelita hatete, bebe idade fulan-6 ne'e, husi Suku Samalari, Postu Administrativu, Baukau Vila, Munisípiu Baukau ne'ebé moras kondisaun isin manas no evakua mai HoREX iha loron 03 fulan-janeiru tinan 2022.

"Ami mai horseik dadersan, hodi kalan ami toba de'it iha varanda, ami sente triste, tanba pasiente toba iha liur, labarik ne'e, idade foin mak fulan-6," dehan nia iha HoREX Baukau, sesta (04/02).

Tanba ne'e, husu ba Ministéiru Saúde atu rezolve problema kama ba pasiente ne'ebé dadaun iha HoREX Baukau menus.

Nune'e, Xefe Kontrolu Kualidade no komunikasaun sosial HoREX, Claudino Ximenes hatete, sala ba pasiente labarik nian, ne'ebé dadaun pasiente sira utiliza hamutuk-3.

"Sala emerjénsia bai-bain ami tau kama 12 atu halo observasaun, agora ne'e to'o tiha ona 25-resin  mós la sufisiente nafatin inklui sala pediatria rasik lolos ne'e kama 16 de'it, ita aumenta extra nia to'o 24, maibé agora ami tau iha sala pediatria nian kama hamutuk 54 espasi de'it laiha tiha ona," nia esplika

Maibé, pesoál saúde sira kontinua esforsu atu aumenta kama no kulisaun ba pasiente sira no buka ema tekníku hodi solda kama ne'ebé mak a'at ona.

Enkuantu iha sala sirurjia ho ortopedia ba pasiente ne'ebé planu atu halo operasaun sei kansella no atende de'it pasiente ne'ebé ho emerjénsia, tanba sala refere utiliza ba pasiente emerjénsia.

"Operasaun bai-bain, kazu urjente mak bele atende buka meius para operasaun, maibé kazu sira ne'ebé planeia ne’e, ita sei bele tunda, lori loron ga lori fulan sei bele tunda seida'uk fó impaktu makas, entaun sei tunda ida ne'e seida'uk bele halo," nia hatete

Kona-ba Ai-moruk atu halo tratamentu ba paisente ne'ebé ativu iha HoREX Baukau sei sufisiente hela.

Entertantu kazu dengue ne'ebé dadaun rejistu durante fulan-janeiru iha HoREX Baukau hamutuk 60 no tuir dadus kazu Pneumonia mak númeru a'as liu dengue. (*)