Print this page

Pneumonia Hamate Ema Na’in-2 iha Ospitál Baukau

By January 31, 2022 764
Xefe Kontrolu Kualidade no komunikasaun sosial HoREX, Claudino Ximenes. Xefe Kontrolu Kualidade no komunikasaun sosial HoREX, Claudino Ximenes. Foto Tomas Freitas

Tempotimor (Baukau)-Moras infeksaun Pneumonia hamate ona labarik na'in-2 iha Ospitál Rejionál Eduardo Ximenes (HoREX-sigla portugues) Baukau.

Xefe Kontrolu Kualidade no komunikasaun sosial HoREX, Claudino Ximenes hatete, médiku sira esforsu fó tratamentu ba sira tuir moras ne'ebé pasiente sira infrenta, maibé kondisaun grave, labele salva.

"Sira na'in rua ne'e mate, ida kauza husi infeksaun Pneumonia, ida infeksaun iha kakutak mai Ospitál mak mate, sira família sira lori mai Ospitál tarde, kondisaun ne'ebé grave tiha ona mak sira lori mai," dehan Claudino, sabadu (29/01).

Matebia ne’e, ida halo tratamentu durante loron 4, ida seluk loron 12, maibé laiha mudansa.

Tanba, na'in-ida husi Munisípiu Lautém, ne’ebé mosu isin manas durante semana 3 hodi rejulta kondisaun to'o grave no infeksaun tama to'o ulun mak foin família lori ba Ospital, enkuatu na'in-ida seluk husi Postu Administrativu Kailikai mós kondisaun grave tiha ona durante loron 4 iha uma mak família lori ba Ospitál, tanba infeksaun iha kakutak laran.

"Moras ne'e akontese, tanba família sira la halo tratamentu tau iha uma kondisaun grave tiha mak lori mai, ida fali tau iha uma infeksaun tama tiha nia kakutak, bolu CNS ne'e kona iha nia kakutak, tanba hahú isin manas uituan-uituan sira la nota, entaun sai kleur infeksaun tama sira nia kakutak mai doútor sira labele salva," nia esplika

Infeksaun Pneumonia mosu, tanba kondisaun klima, atu evita presiza uma laran moos no loke odamatan anin tama, nune'e ár iha uma laran bele etavel.

Dadaun, ai-moruk ba moras esensial sira iha HoREX Baukau sufisiente hela atu fó tratamentu ba kazu sira ne'ebé ativu.

Matebian na'in-2 mane hotu, ida husi Munisípiu Lautém ho idade fulan-8, ida seluk husi Postu Administrativu Kailikai, Munisípiu Baukau idade fulan-7. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items