Diretór Servisu Saúde Munisípiu Baukau, Domingos Reinaldo da Costa Guterres hatete, vasina doze datolu hahú ona iha loron 27 fulan-janeiru tinan 2022 iha fatin primeiru Batallaun Falintil-Forsa Deféza Timor-Leste (F-FDTL) Lanud Baukau ba ema na’in-122, ne’ebé kompostu husi mane na'in-116 no feto na'in-7, tanba atu ba hala'o servisu iha fronteira.
"Agora ne'e prioridade liu ba liña frente sira, Saúde, PNTL, F-FDTL ba sira ne'ebé servisu iha liña frente importante, ba komunidade jerál ne'e, depois ita halo tiha sosializasaun mak kontinua," dehan Domingos, iha kna'ar fatin, sesta (28/01).
Bainhira remata vasina ba liña frente sira iha Munisípiu Baukau, Servisu Saúde sira sei kontinua ho sosializasaun ba komunidade kona-ba vasina doze datolu nian.
Tanba, planu ne'ebé Govérnu liuhusi Ministéiru Saúde lansa vasina to'o doze datolu, atu aumenta sidadaun sira nia imunidade hodi kontra pandemia surtu covid-19 iha Timor-Leste.
"Di'ak liu ne'e hotu-hotu tenke hetan vasina atu prevene nafatin karik moras tuir mai," nia informa
Tanba ne'e, fó hanoin ba komunidade hotu atu partisipa iha vasina doze datolu bainhira lansa, tanba iha nasaun barak sei afeita ba surtu covid-19.
Enkuantu vasina doze datolu ba Munisípiu Baukau dadaun ne'e iha vial-100 ba liña frente ba ema na'in-60. (*)