“Apelu mós ba família sira liliu inan-aman sira atu iha tempu udan kuidadu ita-nia oan sira iha uma, liuhusi ai-hán nafatin kuidadu sira-nia ijine uma laran ijine moos atu labarik sira-nia imunidade forti, kuandu sira forti sira-nia isin ne'e bele rejiste bele kontra moras hothotu”, dehan Espoza PR hafoin halo vijita ba Sentru Saude Vera Cruz, Kaikoli, kuarta (19/01).

Agradese mós ba médiku sira tomak ba esforsu ne'ebé mak sira hala'o hodi atende ba labarik sira iha fatin ida ne'e nomós iha fatin sira seluk.

"Ha'u hanoin Ministériu Saúde akompaña nafatin ba situasaun ida ne'e, atu fó atensaun másimu di'ak liután iha fatin ida ne'e, nomós iha fatin seluk", katak nia.

Tanba ne’e rekoñese mós katak, médiku sira, doutor sira ne'ebé mak halo atendementu di'ak tebtebes ba labarik, balun mak sei iha sira-nia kondisaun kritiku hela, maibé barak di'ak no balun hahú di’ak.

Maibé tenke iha komunikasaun di'ak, entre inan-aman no médiku sira atu oinsá iha situasaun ida ne'e bele koopera di'ak hodi haree hamutuk tau matan ba labarik sira.

Diretora Jerál Ministériu saúde, Odete Viegas hatete hahú kedas 2021 fulan-janeiru moras kazu dengue ho diária númeru sa'e.

"Hahú kedas 2021 fulan-janeiru ita enfrenta tan moras kazu dengue ne'ebé sa'e drastikamente, la'ós de'it dengue maibé diaria mós akompaña”, informa nia.

Siknifika katak, ministériu saúde nia papel boot tebes hodi enfrenta no solusiona problema ne'ebé mosu.

"Over load ne'ebé ospital Nasionál Guidu Valadares ho sentru saúde sira enfrenta, entaun ita buka tan espasu ne'ebé bele akomoda moras sira ne'e”, dehan nia.

Nune'e, Vera Cruz hahú kedas iha 5 fulan-janeiru konsege baixa moras 200-resin to'o loron tersa (18/01) konsege fó alta ema na’in-204, no dadaun ne’e iha hela kazu 106.

"Kona-ba fatin ami-nia hanoin ida karik Vera Cruz fatin nakonu ita laiha tan fatin, ita posibilidade bele uza tan Tasitolu. Tasitolu sai hanesan alternativa ida atubele prevene, e aliende fatin ami mós tenke prepara rekursu enfremeiru médiku sira”, informa nia. (*)