Ministru Prezidénsia Konsellu Ministru (MPKM), Fidelis Leite Magalhães, husu ba komunidade sira iha Timor laran tomak, atu labele soe lixu arbiru iha fatin públiku sira.
“Agora ezemplu ida ita ba Metiaut de'it iha ne'ebá ne'e ita triste tanba dala barak alin foinsa'e sira mak uza fatin sira ne'e dalabarak maibé depois soe hela teh botol ninia fatin, akua fatin, iha fatin sira ne'ebá nomós fatin barak sidade laran”, dehan Fidelis, iha Palásiu Governu kuarta (12/01).
Tanba kolaborasaun ne'ebé la'o ne'e importante atu labele soe lixu iha fatin públiku sira.
"Maibé ba denge ne'e saúde de'it la to'o, maibé orsida sidadaun hotu nia kolaborasaun, tanba denge ne'e susuk ida ne'ebé moris iha bee lihun moos sira. Tanba ne'e mak importante kuidadu ho lixu sira labele soe lixu arbiru, liliu akua fatin sira, jerigen iha fatifatin”, afirma nia.
Tanba moras denge, moras ida ne'ebé mai husi susuk no la'ós pandemia dadaun, Ministériu Saúde halo ona esforsu oinsá atu redúz moras refere.
"Moras denge moras sira ne'e la'ós pandemia, ne'e moras ke akontese bebeik, ne'e hanesan ita hothotu hatene kona liu país sira ne'ebé sub tropis no tropis ne'ebé ba ida ne'ebé agora Ministériu Saúde esforsu atu rezolve situasaun sira ne'e”, dehan nia.
Dadaun ne'e esforsu balun ne'ebé mak Ministériu Saúde halo ona mak sira halo famigasaun ka rega susuk atu hamenus moras sira ne'e.
Husu mós komunidade sira atu serbisu hamutuk ho parte saúde sira hodi halakon fatin foer sira atu reduz moras denge ne'ebé sai risku ba komunidade sira. (*)