Kazu ne’e, rejesta hafoin tama tinan foun 2022 ne’ebé hahú husi loron 01 to’o mai 10 fulan-janeiru.
Diretór Servisu Saúde Munisípiu Baukau, Domingos Reinaldo da Costa Guterres hatete, moras dengue mosu, tanba husi komunidade nia hela fatin ne’ebé lahamos bee lihun iha vazu ai-fuan nian no valeta sira.
"To'o ohin loron ita rejistu ona, kazu dengue hamutuk na'in-16 iha Ospitál HoREX Baukau kompostu mane na'in-8, feto na'in-8, sira ne'e idade maioria labarik," dehan nia ba www.tempotimor.com iha kna'ar fatin ria-mare vila antiga, segunda (10/01).
Nia dehan, moras dengue ne’e perigu, bainhira halo prevensaun tarde bele hamate ema.
"Husi sira na'in hirak ne'e seida'uk pasiente ida mak hetan grave, hotu-hotu kondisaun di'ak," nia akresenta
Nafatin husu ba komunidade hotu iha Munisípiu Baukau kontinua halo prevensaun husi moras dengue, kalan toba iha moskitéiru laran, hamos hela fatin, inklui hamos bee sira ne’ebé nalihun.
Pasiente hirak ne'e, husi Suku Buibau na'in-ida, Gariuia na'in-4, Tirilolo na'in-ida, Uailili na'in-ida, Bukoli na'in-2, Bahu na'in-ida, Postu Kelikai na'in-ida, Postu Venilale na'in-ida, inklui husi Munisípiu Lautém na'in-4.
Alende ne'e, iha loron 10 fulan-janeiru tinan-2022, Sentru Integradu Jestau Krize (SIJK) Baukau rejistu fali tán kazu pozitivu covid-19 na'in-ida iha sentru saúde Tirilolo.
"Ohin komesa teste fali iha Ospitál Tirilolo pozitivu na'in-ida sira sei ba identifika hela," nia informa
Sidadaun ne’e, viajem husi Inglaterra mai Timor-Leste iha loron 07 fulan-janeiru tinan 2022 bainhira teste PCR iha Dili detekta pozitivu ba Covid-19, maibé tuir informasaun sidadaun ne'e viajem tiha mai Munisípiu Baukau Postu Laga.
"Sidadaun ne'e mane, idade joven hela, tanba ne'e sira sei buka tuir, maibé to'o agora seida'uk hetan," nia hateten (*)