Ministéiru Saúde (MS) kontinua implementa vasina to'o ona doze datolu, posibilidade to'o doze dahaat.
"Variante foun, bolu Omicron uluk Delta agora Omicron, ne'e iha ona Indonezia nia iha ona Australia, neneik sei mai iha ita, variante foun mai tan saidá mak ita halo tan, ita avansa ba vasina," dehan Taur, kinta (06/01).
Tanba, inisiu to'o ohin loron Timor-Leste seidauk sosa vasina hanesan AstraZeneka, Sinovac inklui Pfizer, maibé oferese de'it husi nasaun amigu sira ne’ebé kuaze millaun-rua, maibé dadaun foin uza 1.4 millaun.
"Ita nia metas ba dezembru hakarak atinji 80 pursentu, tanba tuir estudu médiku sira hatete, se ita atinji 80 pursentu bele reforsa ita nia imunidade hasoru moras ne'e, ita lakonsege," PM haktuir
Vasina ne'ebé durante la'o iha teritóriu nasionál sidadaun simu doze primeiru ho pursentu 83 no doze daruak ho pursentu 68.
Nune’e mós iha munisípiu Dili, Baukau, Vikeke no Kovalima mak vasina faze daruak ho pursentu aas.
"Vikeke muturabudor, nia primeiru lugar iha timor, ha'u admira kovalima segundu lugar dili, vikeke ultrapasa pursentu 80 ba doze segundu, Baukau primeira doze pursentu 90," nia akresenta
Maske nune'e, maibé kontinua husu ba Ministéiru Saúde (MS) atu reforsa medida hodi luta hasoru variante omicron.
"Agora ita buka sorte de'it, se mak moris hela se mak lakohi moris mate, agora avansa ba treseira doze, maun ramus horta mak primeira pesoa simu doze treseiru," nia afirma
Tanba ne'e, husu ema hotu ho idade-60 ba leten prepara-aan simu vasina doze datolu, posibilidade bele to'o doze dahaat.
Tanba, medidas hotu ne’ebé Governu atu garante sidadaun sira nia saúde, tanba iha nasaun seluk ema buka vasina hodi prevene-aan husi variante sira, maibé iha TL membru Governu inklui xefe Governu mak ba buka nia sidadaun hodi fó vasina.
Enkuantu, Timor-Leste iha tinan 2020 to’o 2021 ema ne’ebé mate ba covid-19 hamutuk na'in-122, maibé iha nasaun avansadu Brazil pur-volta rihun 600-resin, nune'e mós iha Estadu Unidus Amérika (EUA) primeira poténsia Militár no ekonomia iha Mundu mate rihun 800-resin. (*)