Joven na’in-5 ne’e, husi Suku Gurusa, Postu Administrativu Kelikai hamutuk ho nia família ba peknik iha tasi Bina-gua hodi haris tasi, maibé maizoumenus iha tuku 12 liu minitu balun akontese sira mout iha tasi, tanba kauza husi korente tasi nian ne’ebé boot.
Xefe Aldeia Lakulela, Suku Gurusa, Aquilis Emelio Gaio haktuir, joven na'in-7 inklui maluk sira tama tasi laran hodi haris, maibé korente tasi makas konsege lori sira, maibé mane na'in-2 konsege salva no na'in-5 la konsege salva.
"Na'in-5 ne'e mate, iha tasi Bina-gua, tanba laloran mak boot, na'in-7 tama hotu, mane na'in-2 salva," dehan nia ba www.tempotimor.com, domingu (02/01).
Hafoin akontesimentu, iha peskadór ida ne’ebé besik sira tama tuir ba tasi hodi buka joven hirak ne’e, to’o hetan hotu no lori ba sentru saúde laga, maibé salva de’it na’in-2 no na’in-5 seluk la konsege salva sira nia vida.
"Ha'u fó hatene peskadór-ida, tanba nia toba ha'u hader, nia ba sira na'in-4 mate hotu ona mak katuas ne'e lori sai, maibé na'in-ida hela iha tasi laran, polísia ba mak foin hetan," nia afirma
Komadante Polísia Nasionál Timor-Leste (PNTL) Munisípiu Baukau, supirientendente xefe António Maria de Sá haktuir, akontesementu ne'e ohin iha Bina-gua.
"Sim, akontesementu ohin, sira ba haris tasi iha Bina-Gua Laga nian, sira na'in-5 mate hotu", dehan nia
Matebian na’in-5 ne’e, kompostu husi mane na'in-2 no feto na'in-3, dadaun lori ona ba sira nia hela fatin Suku Gurusa. (*)