Asidente ne’e, rejulta pasajeiru balun kanek todan no balun kaman, laiha mate.

Médiku Jerál Sentru Saúde Laleia, Nerio Sousa hatete, hafoin akontesimentu karreta ambulansia husi sentru saúde Laleia transporta kedas vitíma na'in-14 ba sentru saúde hodi hetan primeiru sikoru husi médiku sira.

"Tama iha Ospitál ne'e ema pur-volta 14 pasajeirus, feto-ida mane-ida hetan tohar, iha liman no ain, balun hetan politraumatitis pankada makas kanek hamutuk na'in-8, labarik menus husi idade-5 mai kraik na'in-4," dehan Nerio, sesta (31/12).

Pasajeiru mane-ida ne'ebé hetan tohar iha kelen karuk no feto-ida hetan kanek iha parte ain loos liman karuk no ain loos, tanba hetan pankada makas.

"Na'in-rua ne'ebé hetan kanek grave, horsida observasaun husi sentru saúde sira bele rekupera fali, maibé presiza tempu," nia akresenta

Enkuatu pasiente na'in-14 ne'ebé halo tratamentu iha sentru saúde Laleia, transporta ona na'in-9 ba Ospitál Nasionál Guido Valadares (HNGV-sigla portugues), ida ba Ospitál Regionál Eduardo Ximenes (HoREX) Baukau no na'in-4 seluk fila ona ba uma hafoin simu tratamentu iha sentru saúde Laleia.

Nune'e, Komadante Polisia Nasionál Timor-Leste (PNTL) Munisípiu Manatutu, Superintendente João da Costa haktuir, kronolojia akontesementu ne’e, iha área laleia Manatutu, tanba halai ses husi estrada.

Maibé, atu hatene motivu lolos husi akontesementu, dadaun ne'e Polísia tranzitu Munisípiu Manatutu iha hela tereñu halo identifikasaun.

"Ohin dadersan karreta bus diresaun husi Dili Baukau, halai ses husi estrada rejulta pasajeiru balun hetan kanek no tohar, maibé atu hatene lolos motivu akontesementu, ami nia membru Polísia Tranzitu sei halo identifikasaun fatin akontesementu," nia afirma.

Vitima sira evakua hotu ona ba Sentru Saúde no Bus refere dadaun iha hela fatin akontesimentu. (*)