"Iha Timor-Leste problema Inseguransa Ai-hán no Má-nutrisaun sei as iha fatin balun iha mundu. Iha dadus hatudu katak Inseguransa Ai-hán iha nível mundiál pursentu 28 (28%), iha Ázia pursentu 24 (24%), iha sudeste Aziatiku pursentu 18 (18%), enkuantu iha Timor-Leste pursentu 36 (36%)”, dehan Taur bainhira partisipa prémiu Nutrisaun Primeiru Ministru 2021 iha Salaun Laline Larigutu, Kolmera, tersa (28/12).

Tanba foin dadaun Governu aprezenta Orsamentu Jerál Estadu (OJE) tinan 2022 iha Parlamentu Nasionál, Primeiru Ministru foti assuntu Inseguransa Ai-hán no Má-nutrisaun hodi tau prioridade ba tinan 2022 nian.

Bainhira ezisténsia nasaun ida iha presiza mak iha ninia sidadaun inklui mós ekonomia oinsá atu garante vida sidadaun sira iha nasaun ida.

Adjuntu Diretór World Food Programme (WFP), iha Timor-Leste, Ash Rogers hatete, nia parte orgullu hodi hola parte iha faze importante ida ne'e.

"Nasaun Unidas, partikularmente WFP/ Programa Ai-hán Mundiál (PAM) sente urgullu hodi hola parte iha faze importante ida ne'e, prémiu nutrisaun ida ne'e hanorin ita kona-ba importánsia papél saúde, nutrisaun no dezenvolvimentu sosio-ekonomiku iha rai laran”, hatete nia.

Tanba durante ne'e Gabinete Primeiru Ministru liliu Gabinete Apoiu Sosiedade Sivíl (GASS) no Programa Al-hán Mundial (WFP/PAM) servisu hamutuk hodi fó prémiu ba manán na'in prémiu nutrisaun tinan 2021, atu fó rekoñeseumentu komunidade lokál no grupu sira hodi sai ezemplár liuhusi sira-nia kometimentu hodi mellora Estadu nutrisaun no redúz problema má-nutrisaun iha Timor-Leste.

Prémiu Nutrisaun ida ne'e hetan apoiu finanseiru hamutuk rihun US$100 husi WFP/PAM no hetan apoiu tékniku husi GPM, liliu Sekretáriadu Movimentu Mellora Nutrisaun ka SUN Movement, Ministériu Saúde, Ministériu Agrikultura no Peskas, Parseiru Dezenvolvimentu Umanu (PHD), Organizasaun Mundial Saúde, no UNICEF. (*)