Brigadeiru Jeneral, João Miranda “Aluc” Descartes konsidera klinika veteranus David Alex Dai-tula iha signifikadu boot no orgullu, tanba klinika refere bele servi veteranu sira nia moras.
"Hanesan Veteranus ha'u sente orgullu ho vontade doútores sira ho laran luak hola parte iha klinika ne'ebé hanaran David Alex Dai-tula atu fó asistensia ba ita nia veteranu sira", dehan Brigadeiru Aluc, sabadu (18/12).
Tanba, dala barak Governu esforsu lori aman veteranu sira ne'ebé moras ba halo tratamentu saúde iha rai liur, maibé tarde iha atendementu Administrasaun balun to’o lakon vida.
Tanba ne'e, hanesan veteranu sente orgullu ba Konsellu veteranu Munisípiu Baukau nia esforsu tomak no mós agradese ba Ministéiru da Saúde fó ona sentru saúde Ria-Mare ne’ebé sai klinika veteranu nian.
"Ha'u fiar klinika ida ne'e, la'os ba veteranu Baukau nian de'it, maibé ba veteranu Timoroan tomak", dehan Aluc
Nune'e, Prezidente CCLN, Vidal de Jesus 'Riak Leman' hatete, klinika veteranu David Alex Dai-tula importante tebes ba veteranu sira iha Timor-Leste atu hala'o tratamentu saúde bainhira iha problema saúde.
"Inisiativa di'ak husi Konsellu Munisípal Baukau hodi halo koperasaun ho Ministéiru da Saúde", Vidal hatete
Nia dehan, klinika refere la'os atende de'it ba aman veteranu sira, maibé nakloke ba ema hotu bainhira presiza, tanba aimoruk ne'ebé iha klinika veteranu David Alex Dai-tula foti husi Ministéiru da Saúde.
Entertantu Sekretáriu Jerál Konsellu Veteranu Munisípiu Baukau, Manuel da Costa Soares afirma, antes ne'e, halo ona enkontru ho Ministéiru da Saúde, sira simu proposta husi Konsellu Veteranus Baukau no aprova ona muda sentru saúde Ria-Mare ba Klinika veteranu David Alex Daitula hodi atende aman veteranu sira.
Prezensa klinika ne’e, atu fó asisténsia dignu ba veteranus sira no minimiza veteranu sira ba Ospitál hodi hamrik liña ne'ebé naruk hafoin hetan atendementu.
"Ami hahú iha loron 16 to'o loron 30 fulan-novembru ami konsege haboot ami nia programa autriks, klinik ba postu, iha tipu moras sanulu mak domina veteranus sira husi postu neen", nia hatete
Tanba, iha dadus durante hala'o movél klinik kobre Postu Administrativu iha Munisípiu Baukau, konsege deteta veteranu ema na’in-383 mak problema matan ne’ebé iha na’in-10 tenki halo operasaun ba matan.
Nia akresenta, problema nehan hamutuk na'in-340, tensaun aas na'in-310, autriks na'in-175, pulmaun króniku na'in-71, teratristiti na'in-51, paralezadu na'in-21, rins na'in-21, prostat na'in-9, problema ruin na'in-4 no moras seluk hamutuk na'in-214.
Nune'e, Embaixadora Timor-Leste ba estadu Canberra, Inés Almeida mós kontente haree klinika veteranu ne'ebé hanaran David Alex Daitula.
"Ha'u foin to'o husi Australia kuarta-feira, iha programa ne'e ha'u esforsu mai duni haree klinika ida ne'e, ha'u la promote, maibé intermus de apoiu Timor-Leste sorte tebes, tanba ita sei iha maluk Australiano barak hakarak apoiu ne'e hahú husi tempu rezisténsia até agora", dehan Inés
Maibé, importante iha transparansia bainhira Governu Australia apoiu tenke iha relatóriu no fotografia.
Tanba ne’e, nia parte pronto buka doadores atu apoiu klinika veteranu David Alex Daitula, tanba tempu to'o ona atu harii klinika ida hodi tau matan ba aman veteranu sira nia kondisaun.
Klinika veteranu David Alex Daitula Baukau iha Médiku Espesialista na'in ida, Médiku Jerál na'in-4, Enfremeiru na'in-2, Saúde Públiku na'in ida. (*)
