"Prezidente alerta nafatin Governu tau matan liliu ba Covid-19, para Covid-19 ne'e la bele prezudika vida sidadaun sira-nian, entaun sua eselénsia husu para Governu kontinua aselera kampaña vasinasaun, paraque ne'e forma ida únika ita bele proteze ita-nia sidadaun sira-nia vida", dehan PM Taur Matan Ruak, hafoin hasoru malu ho PR Lú Olo iha Palásiu Prezidensiál Bairopite, kinta (24/11).
Tanbe ne'e Primeiru Ministru, Taur Matan Ruak mós apela ba populasaun sira, ne'ebé seidauk simu vasina, halo esforsu-an atu partisipa iha vasina.
"Ita vasina iha, importante liu mak sira partisipa aktu vasinasaun ne'e", hatete nia.
Enkuantu ho aprovasaun lei baze saúde nian husi parlamentu nasional Timor-Leste laiha ona Estadu Emerjénsia, hanesan mós Serka Sanitária, konfinamentu obrigatóriu, maibé nafatin avansa maka’as ho kampaña vasinasaun atu evita moras ne'e la bele daet.
Dadaun ne'e ema ne'ebé hetan moras Covid19 hela na'in-2, númeru vasina iha primeira doze pursentu 80 no segundu doze pursentu 62.
"Ita tenke esforsu para to'o fin do ano ne'e ita bele pursentu 80, karik ita konsege ne'e di'ak liu ba ita tinan oin normalizasaun situasaun, nomós fasilita ita ba rekoperasaun ekonomia", esplika Taur.
Maske estadu emerjénsia laiha, maibé dadaun ne'e Governu mós prepara dekretu lei atu kontinua bele implementa.
"Dekretu lei ne'e vale ba loron 120, tuir artigu 3 lei baze saúde nian, ne'ebé nia validade loron 120, ne'e siknifika fulan 3, ne'ebé ida ne'e fó dalan ba ita deskrinji ema nia direitu, ezemplu ema ne'ebé mai husi liur nia obrigatóriu aprezenta ninia kartaun vasina, aprezenta katak nia negativu ba Covid-19, nia (pozitivu) tenke ba konfinamentu", afirma Taur. (*)