"Ema vulneravel sira, liliu Ema ho Defisiénsia kontinua sai vítima iha prosesu Dezenvolvimentu Nasionál, Konstrusaun Sentina Públiku sira kontinua la hatudu sensivel ba ema hotu. Tuir Monitorizasaun husi Membru RHTO ba Fasilidade Sentina Públiku sira iha Dili laran hanesan João Paulo II Tasi Tolu, Área Bebonuk Tasi Ibun, Jardín 5 de Maiu,  Largo Lesidere, Jardín Ponte Habbibie no Kristu Rei”, dehan portavóz, Auxiliadora Soares Lobato, iha edifísiu Yayasan Hak, Faról, sesta (19/11).

Durante monitorizasaun, PN-BESI-TL mós identifika sentina públiku hamutuk 8, balun iha kanalizasaun bee-moos (1, Jardín 5 de Maiu), no Sentina rua iha asesibilidade (Largo Lesidere), maibé ema labele utiliza tanba odamatan taka, maioria (6) mak ho kondisaun la asesivel no sentina 7 laiha bee.

Tanba ne'e, dezenvolvimentu sustentável sira ne’ebé hakerek ona iha Planu Estratéjiku Dezenvolvimentu Nasionál katak, to’o iha 2030 uma-kain hotu iha Timor-Leste sei asesu ba fasilidade bee-moos no saneamentu ho adekuadu no sustentável.

Ih ne'e, Governu mós konsidera saneamentu sei nafatin sai nu’udár prioridade Nasionál, no Investimentu ba asesu bee hemu ne’ebé seguru no saneamentu báziku ujentimente presiza tebes, no falta infraestrutura afeta maka’as ba Saúde Públiku no populasaun sira-nia kualidade moris, kontribui ba hada’et moras, mortalidade no dezenvolvimentu labarik sira-nian ne’ebé mukit tebes.

“Governu konsidera investimentu iha setór saneamentu báziku nu’udár prioridade ida no nu’udár maneira ida ne’ebé sustentável hodi kombate pobreza”, esplika nia.

Nune’e, iha kontestu dezenvovimentu setór Saneamentu iha Timor-Leste tuir relatóriu JMP ikus liu katak populasaun Timor-Leste ne’ebé asesu ona ba saneamentu purvolta 61%, no saneamentu urbanu kobertura besik 70% no kobertura saneamentu rurál 49%. 

Ida ne’e progresu di’ak kompara ho rezultadu Sensus 2015, 57%, progresu ida ne’e nu’udar kontribuisaun maka’as tebes husi Governu ne’ebé lidera programa ALFA iha Timor-Leste, no deklara ona ALFA iha Munisípiu 7. 

Maske iha progresu pozitivu maibé husu Governu atu presiza esforsu nafatin nune’e komunidade bele mantein ALFA no Munisípiu sira mak seidauk deklara bele kontinua esforsu hodi atinje deklarasaun ALFA iha tempu badak.

Tanba, Governu liuhusi Ministériu relevante iha ona Polítika ne’ebé klaru, maibé laiha Planu no programa ne’ebé adekuadu atu bele haforsa Polítika refere ba atinjimentu sira tuir tarjetu hirak ne’ebé hatuur ona iha polítika ne’e rasik.

Rekomenda ba Governu presiza iha investimentu ne’ebé sériu no natoon iha alokasaun OJE kada tinan ba setór bee-moos no Saneamentu, nune’e bele dezenvolve setór refere hodi atinje meta PEDN 2030. 

Husu atu hadi’a polítika publika sira hodi responde ba problema krusial povu nian, liliu Polítika Integrasaun GESI iha BESI. (*)