Tanba, iha loron 18 fulan-novembru tinan 2021, promulga ona Dekretu Parlamentu Nasionál ne’ebé ho númeru 53/V kona-ba alterasaun dahuluk ba Lei númeru 10/2004, Lei Sistema Saúde, no aprova medidas esesionais no temporária hodi hatán vijilánsia sanitária ba moras Covid-19.
Ba alterasaun dahuluk ba Lei Sistema Saúde ne’e, bele ona aplika restrisaun balun ba ema nia direitu atu proteje saúde públika, nune’e estadu la presiza implementa ona estadu emerjénsia.
"Agora ne'e, serka sanitariu la iha ona, konfinamentu obrigatóriu no estadu emerjensia laiha ona, importante liu mak ita tenke vasina para ita-nia umunidade boot", dehan PR hafoin diálogu ho komunidade iha Salaun Parokia Ainaru, kinta (19/11).
Bainhira, populasaun sira simu vasina atinje ona pursentu 70-80, Timor-Leste livre ona hodi hala'o atividade.
Nune’e, Administradór Munisípiu Ainaro, Leo Vasílio Amaral Pereira haktuir, Primeiru Ministru, Taur Matan Ruak mobiliza membru Governu sira tun mai baze halo advokasia ba komunimidade sira atu partisipa iha vasina no konsege Munusípiu Ainaru atinje ona vasina pursentu 7,4.
"Hanesan Governu lokál, ami enkoroja povu atubele partisipa iha vasina hodi livre husi situasaun serteza, maibé informasaun falsa barak mak sirkula iha mídia sosiál hodi afeta númeru vasinasaun menus tebes", dehan nia. (*)
