"Maske ita nia kazu pandemia iha Baukau númeru menus, ita nafatin kuidadu ita nia aan mantein regras husi OMS (Organizasaun Mundiál Saúde) uza nafatin maskra, distánsia no mós fase liman bei-beik", dehan nia ba media sira, tersa (16/11).

Tanba, iha loron 8 fulan-novembru tinan 2021 detekta tán sidadaun feto ida ho idade-47 iha Ospital Referal Eduardu Ximenes (HoREX) Baukau.

Nune'e mós, iha loron 10 fulan-novembru tinan 2021 detekta sidadaun mane ida ho idade-65 iha HoREX Baukau, bainhira atu ba vizita família ne'ebé mak moras.

Depois detekta sidadaun na'in-2 ne'e, ekípa husi pilár 3 no 5 halo aprosimasaun iha sidadaun nia hela fatin priense kriteiru, nune'e kumpri auto-izolamentu iha uma, maibé ekípa SIJK kontinua halo aprosimasaun.

"Izolamentu iha fatin rua, ida mak ita tau iha eis SPK tirilolo, ida mak iha riamare ba inan isin rua no mós ba ema jerál", nia informa

Tanba ne’e, maske númeru kazu iha Munisípiu Baukau redús ona, maibé SIJK kontinua halo monitorizasaun ba iha fasilidade saúde hotu ne'ebé estabelese, nune'e bainhira detekta sidadaun balun konfirmadu positivu ba covid-19 SIJK bele halo aprosimasaun direita ho pasiente sira atu kumpre regras iha izolamentu ou iha uma rasik.

SIJK mós kontinua apoiu pesoál saúde sira halo kampaña vasina iha Munisípiu Baukau, nune’e dadaun vasinasaun Baukau atinji ona pursentu 80-resin. (*)