Iha atividade kampaña vasinasaun ne’e Ministru MAPKOMS, Francisco Jerónimo hatete, mundu ohin loron taxa mortalidade iha redusaun maka’as, mundialmente dadus provizóriu hatudu katak ema mate hamutuk 4.800.000 resin, maibé ho vasina komesa redús ona ema mate.
Iha Timor-Leste, ema ne’ebé moras Covid-19 mós komesa menus, liliu iha Dili moras ne’e nia númeru komesa minimiza lahanesan uluk, tanba Dili 80% hetan ona vasina ba primeiru doze, segundu doze to’o ona 70%.
“Tanba ne’e fó ona ezemplu ba ita hotu katak, vasina mak sai xave importante tebes ba ita idak-idak atu proteje ita-nia saúde, família, komunidade no ita-nia nasaun, tanba ne’e laiha ona dúvida ba ita hotu atu ba simu vasina, nune’e husu mós ba joven no inan-aman sira atu hakbesik-an ba sentru saúde ne’ebé besik hodi simu vasina ne’e”, dehan Ministru Francisco, iha Suku Fahisoi, sábadu (23/10).
Sekretáriu Estadu Arte no Kultura, Teófilo Caldas, reforsa katak “tradisaun hanorin ita atu fiar no rona malu, ho nune’e husu ba ita hotu atu labele dúvida no fó konfiansa tomak ba ita nia Estadu, ba ita nia Governu atu nune’e ema hotu-hotu bele asesu ba vasina hodi salva vida”.
Sekretáriu Estadu Terras no Propriedades, Mario Ximenes, mós husu ba komunidade sira iha suku Fahisoi atu labele fiar informasaun falsa sira ne’ebé mak espalla husi pesoál irresponsabilidade sira, maibé fiar ba mídia kredível sira, liliu ba profisionál saúde sira hodi nune’e, sidadaun hotu bele hakat ba postu saúde sira ne’ebé mak iha ona hodi simu imunizasaun kontra moras aat ne’e.
Provizoriamente, taxa partisipasaun ba programa imunizasaun kontra Covid-19 iha territóriu Timor-Leste hatudu katak, munisípiu Aileu okupa iha pozisaun da-ualu ho pursentu 61.5, enkuantu Covalima konsege tuur iha pozisaun dahuluk ho pursentu 86,4 no Ermera mak okupa okupasaun ikus ho pursentu 52,1.
Marka mós prezensa iha kampaña ne’e, Administradór Postu Lekidoe, Diretór DNDI-MAPKOMS, Diretór Saúde Munisípiu Aileu, Komandante Eskuadra Postu Lekidoe, Reverendísimu Amu Pároku Lekidoe, líder komunitáriu, reprezentante veteranu, pesoál saúde nomós komunidade sira. (*)
