"Husu ba komunidade sira atu hakbesik-an ba sentru saúde hodi simu vasinasaun, nune’e bele proteje ita-nia an, ita-nia família liuliu iha ita-nia komunidade nomós ba ita-nia nasaun”, dehan Ministru Francisco Martins, bainhira hala'o Kampaña vasinasaun Covid-19 iha Suku Daisoli, Postu Administrativu Aileu Vila, Munisípiu Aileu, tersa(19/10).
Tanba, importante tebes atu komunidade sira partisipa no rona diretamente bainhira membru Governu sira marka prezensa hodi halo advokasia no esplika kona-ba lala’ok vasinasaun liuliu vantajen husi simu vasinasaun ne’e rasik.
Ho ida ne’e, ema hotu tenke kontribui hodi bele iha sirkulasaun livre ba kualkér atividade ne’ebé hakarak halo, liuliu ba negosiante sira atu fa’an sira-nia sasán.
"Se ita rona no partisipa másimu iha vasinasaun, ne'e ita kontribui ona, no livre atu halo sirkulasaun ba atividade hotu ne'ebé ema hotu hakarak halo, liuliu ba ita-nia negosiante sira, sira bele fa’an sasán ho livre”, dehan nia.
Aleinde ne'e MAPKomS husu ba komunidade no partisipante sira hotu, atu labele rona liu lia-falsa sira ne’ebé mak espalla iha mídia sosiál nomós iha sosiedade nia leet. (*)